Qaraǵandy oblysynyń ákimi Ýnıversıada Alaýymen 200 metrge júgirdi

QARAǴANDY. QazAqparat - Qaraǵandyda Ýnıversıada Alaýy estafetasyn oblys ákimi Nurmuhambet Ábdibekov ashty, dep habarlaıdy «QazAqparat» HAA tilshisi.

Buryn habarlanǵandaı, Qaraǵandy oblysynda 28-shi qysqy Ýnıversıada-2017 Alaý estafetasy Temirtaýda - QR Tuńǵysh Prezıdenti Nursultan Nazarbaevtyń alǵash eńbek jolyn bastaǵan mekeninde bastaldy. Alaýdy domna peshinen metallýrgter jaqty.

Alaýgerler Temirtaýdan Alaý qorǵaýshylarymen jáne eriktilermen birge Qaraǵandyǵa keldi. «Shahter» stadıonynyń mańynda saltanatty mıtıng ótti.

Temirtaý men Qaraǵandy ákimderi alaýdy óńir basshysyna tabystady.

 

«29 qańtar kúni, Ýnıversıada Alaýy Almatyda jaǵylǵan kúni oǵan qaraǵandylyq bóligi kelip qosylady. Bul alaýda árbir qaraǵandylyqtyń júreginiń jylýy bar», - dedi Ábdibekov quttyqtaý sózinde.

Óńir basshysy estafetanyń alǵashqy 200 metrin júgirip ótip, alaýdy QarMTÝ stýdenti Sergeı Ivanovqa tabystady.

 

Qaraǵandyda joǵary oqý oryndarynyń eń úzdik 60 stýdenti alaýger retinde tańdalyp alyndy. Oblys ortalyǵyndaǵy estafetanyń marshrýty 9 shaqyrymdy quraıdy. Qala alańdarynda jáne ýnıversıtetter mańynda fleshmobtar ótýde.

Alaý estafetasy «Qaraǵandy Arena» Muz saraıynda aıaqtalady. Shara sońynda jergilikti mánerlep syrǵanaýshylar men hokkeıshiler, Ombydan kelgen reseılik balet ártisteriniń qatysýymen muz shoýy ótedi.

Alaýdy keshke arnaıy shyny saýytqa salyp, Almatyǵa ushaqpen jiberedi. Ony Alaý estafetasynyń tehnıkalyq delegaty, jas boksshy Abylaıhan Júsipov alyp barady.