Qaraǵandy oblysynyń ákimi Ýkraına elshisimen kezdesti

QARAǴANDY. QazAqparat - Qaraǵandy oblysynyń ákimi Qazaqstandaǵy Ýkraınanyń Tótenshe jáne Ýákiletti Elshisimen kezdesti, dep habarlaıdy óńir basshysynyń resmı saıty.

Erlan Qoshanov pen Ivan Kýleba túrli salalardaǵy ekijaqty áriptestiktiń damý áleýetin talqylady. Erlan Qoshanov  qonaqtarǵa oblystyń ekonomıkalyq múmkindikteri jaıly aıta kele, óńirdiń birinshi kezekte ındýstrıaldy iri aımaq ekenin atap ótti. Ekonomıkanyń negizin qara jáne tústi metallýrgııa, taý-ken ónerkásibi men mashına quraıdy.

«Bizdiń aımaqtyń ónimderi álemniń 50 astam elderine eksporttalady, onyń ishinde Ýkraınaǵa da. Qaraǵandy oblysynyń Ýkraınamen syrtqy naryq aınalymynyń kólemi jyl basynan beri 84 mıllıon teńgeni qurady. Biz ári qaraı da ózara tıimdi saýda-ekonomıkalyq áriptestikti jalǵastyrýǵa jáne damytýǵa múddelimiz», - dep qosty Erlan Qoshanov. 

Búgingi tańda oblysta ýkraındyq kapıtaldyń qatysýymen túrli salalarda 255 kásiporyn jumys istep jatyr. Ivan Kýleba birlesip júzege asyrýǵa bolatyn bıznes-jobalardyń jańa nusqalaryn usyndy. Buǵan qosa elshi aımaq basshylyǵyna qurmetpen qarsy alǵandary úshin alǵysyn bildirdi. 

«Biz sizderge qonaqqa qýana keldik. Eń aldymen men sizdermen kezdeskenime qýanyshtymyn. Bul jerde 45 myńǵa jýyq ýkraındyqtar ómir súrip jatqanyn bilemin. Biz kóptegen adamdarmen kezdesemiz, olar erekshe jylylyqpen Qazaqstandaǵy ómirlerin eske alady. Jáne de olarǵa dástúrleri men mádenıetin saqtap qalýǵa múmkindik beriletini biz úshin óte qýanyshty jaıt»,- dedi ol.