Qaraǵandy oblysynyń ákimi turǵyndardyń shaǵymy boıynsha Temirtaý men Shahtınskiniń jylý júıesin tekserdi
Bul qalalardyń turǵyndary qys mezgilinde úıleri sýyq bolatynyna birneshe ret shaǵymdanǵan. Sondyqtan jylý taratý nysandarynyń jóndelýi bıliktiń jiti baqylaýynda, dep habarlaıdy QazAqparat tilshisi.
Shahtınsk jylý elektr ortalyǵynyń (JEO) tozýy 75% quraıdy. Qazirgi ýaqytta jóndeý jumystary kesteden artta qalyp otyr, qyzmetkerler jetispeıdi. Jumys saparymen energııa obektisine Qaraǵandy oblysynyń ákimi Ermaǵanbet Bólekpaev keldi.
10 jyl boıy Shahtınsk JEO-da negizgi jabdyqqa kúrdeli jóndeý júrgizilmegen. Bıyl úsh qazandyq pen eki týrbına jóndelýde. Eki merdiger kompanııa jumys isteıdi.
№ 1 jáne 4 qazandyqtar boıynsha jumystar merzimge saı júrip jatyr. Barlyq materıaldar qoljetimdi. №3 qazandyqty jóndeıtin merdiger uıym kesteden artta qalyp keledi, adamdar jetispeýde. Oblys ákimi brıgadany 10 adamǵa deıin ulǵaıtýdy jáne jergilikti ákimdikke kún saıyn jumystardy baqylaýdy tapsyrdy.
Tútin soratyn bóliktiń ústindegi shatyr apattyq jaǵdaıda. Qazir konkýrstyq rásimder júrip jatyr. Qyrkúıek aıyna deıin shatyr jóndeledi dep josparlanýda.
Energııa nysanynda bolyp qaıtqan Ermaǵanbet Bólekpaev qala basshylyǵy men JEO-ǵa jylytý maýsymyna daıyndyq úshin árkimn derbes jaýapkershilik taratatynyn eske saldy.
«Qys mezgiline daıyndyq úshin qalalar men JEO basshylyǵy jeke jaýap beretin bolady. Eger jetispeıtin bolsa, adamdardy jaldańyzdar! Qajet bolsa, táýlik boıy jumys jasańyzdar! Energııany qadaǵalaý mamandary da kún saıyn jumysty baqylap otyrýy kerek», - dep atap ótti óńir basshysy.
Sondaı-aq, Ermaǵanbet Bólekpaev Temirtaýdaǵy JEO-2-de boldy.
Bıyl metallýrgter qalasynda jylytý maýsymy jetinshi qazandyqsyz ótedi. Ony salý merzimi keshiktirilýde. Áli de qurylys alańynda jumysshylar jetispeıdi, negizgi jabdyqty ornatý artta qalyp keledi.
Jylý kózindegi jóndeý jumystary týraly oblys ákimine JEO-2 dırektory Sergeı Krıvov baıandady.
«Qazir úsh qazandyq agregatynda jóndeý jumystary júrgizilýde. № 1 qazandyqty 1 tamyzda paıdalanýǵa berýdi josparlap otyrmyz. № 4 qazandyqta kondensatorlardy bólshekteý jáne jóndeý jumystary júrgizildi. Besinshi qazandyqta bý qyzdyrǵysh bólshekteledi. Eki qazandyqty paıdalanýǵa berýdiń josparlanǵan kúni - 30 qyrkúıek», - dedi Sergeı Krıvov.
Ermaǵanbet Bólekpavevtiń aıtýynsha, jylytý maýsymynyń qaýipsiz ótý mindetteri ortaq jáne árkim olardy óz deńgeıinde oryndaýǵa jaýapty bolýy tıis.
«Temirtaýda jylytý maýsymy qalaı ótetini osy stantsııaǵa baılanysty. Jospardan artta qalyp jatyrsyzdar - bul shyndyq. JEO dırektory men»ArselorMıttal Temirtaý«kompanııasy moraldyq jáne zańdy turǵyda jaýapty. Sizder temirtaýlyqtardy turaqty jylýmen qamtamasyz etýlerińiz kerek - bul asa mańyzdy másele!» - dep atap ótti Ermaǵanbet Bólekpaev.
Sondaı-aq, jóndeýdi qajet etetin Qaraǵandy metallýrgııa kombınatynyń JEO-BAS jaǵdaıy bılik arasynda úlken alańdaýshylyq týǵyzady.