Qaraǵandy oblysynyń ákimi prezıdent saılaýynda daýys berdi

QARAǴANDY. QazAqparat - Qaraǵandy oblysynyń ákimi Jeńis Qasymbek kezekten tys prezıdent saılaýynda daýys berdi, dep habarlaıdy QazAqparat tilshisi.

Óńir basshysy tirkelgen №42 saılaý ýchaskesi Qaraǵandy qalasyndaǵy ál-Farabı atyndaǵy mektep-gımnazııada ornalasqan.

«Bizdiń ýchaskede 1825 saılaýshy tirkelgen, onyń ishinde 37-si birinshi ret daýys beredi. Úıden daýys berý týraly ótinishter túsken joq. Tańǵy segizge deıin 60-qa jýyq adam daýys berdi», - dedi №42 ýchaskelik komıssııanyń tóraǵasy Sabına Bıjanova.

Daýys berý protsesin kommertsııalyq emes uıymdar men qoǵamdyq birlestikterdiń táýelsiz baıqaýshylary qadaǵalap jatyr.

Esterińizge sala keteıik, Qaraǵandy oblysynda daýys berýge arnalǵan 642 ýchaske bar. Tirkelgen saılaýshylar sany – 770 myńǵa jýyq.