Qaraǵandy oblysynyń ákimi maıdangerlermen kezdesti

ASTANA. QazAqparat - Qaraǵandy oblysynyń ákimi Erlan Qoshanov Jeńis kúni qarsańynda soǵys ardagerlerimen kezdesti. Saltanatty jıynǵa oblystaǵy qalalar men aýdandardan 30 adam keldi, dep habarlaıdy «QazAqparat» HAA tilshisi oblys ákimdiginiń baspasóz qyzmetine silteme jasap.

Maıdangerlerdi orkestrdiń áskerı mýzykasymen qarsy aldy. Óńir basshysy Erlan Qoshanov Memleket basshysy Nursultan Nazarbaevtyń Qazaqstan halqyna arnaǵan Joldaýyndaǵy: «Óz Otanynyń patrıoty bolý - Qazaqstandy máńgilik júreginde saqtaý» degen sózderin eske aldy.

 

«Prezıdent aıtqandaı, qazirgi Qazaqstannyń tabysqa jetýinde soǵys jáne eńbek ardagerleriniń úlesi mol. Bul Jeńis bolmasa, elimizdiń táýelsizdigi bolmas edi. Sizder ózderińizdiń qıyn taǵdyrlaryńyzben, Otan úshin jasaǵan isterińiz arqyly bizge sabyrlyqty, kez kelgen qıyndyqqa tózimdi bolýǵa jáne bolashaqqa senimmen qaraýǵa úıretip jatyrsyzdar. Mine, sondyqtan sizdermen ótetin ár kezdesý - biz úshin óte mańyzdy oqıǵa. Sizderdiń jasaǵan erlikterińiz eshqashan óshpeıdi, máńgilik saqtalady», - dedi Erlan Qoshanov ardagerlerge.

Maıdangerler sany jyl saıyn azaıyp barady. 2010 jyly Jeńis kúnine Qaraǵandy oblysynda 1110 Ekinshi dúnıejúzilik soǵys ardageri  qatysty. Jeńistiń 70 jyldyǵyna deıin 340 maıdanger ómir súrse, qazir olardyń sany nebári 184. Kezdesý barysynda Qaraǵandy oblysynyń qurmetti azamaty Kamalı Dúısembekov, Sátbaev qalasy Ardagerler keńesiniń tóraǵasy Shermuhambet Baıbosynov sóz sóıledi.  

 

Ardagerlerge arnalǵan merekelik kontsertke kásibı ártister men balalar kórkemóner ujymy qatysty. Barlyq qatysýshylarǵa qarjylaı syılyqtar tabystaldy.