Qaraǵandy oblysynyń ákimi bar kúshti qar tazalaýǵa jumyldyrýdy tapsyrdy

QARAǴANDY. QazAqparat - Qaraǵandy oblysynda qańtar aıy qarly bolýyna baılanysty ony tazalaý qıyndaı tústi. Sınoptıkterdiń málimetinshe, aı basynan beri oblys ortalyǵynda eki aılyq jaýyn-shashyn túsken, al keıbir aýdandarda – tórt aılyq norma kóleminde qar jaýǵan, dep habarlaıdy QazAqparat tilshisi.

Qaraǵandy oblysynyń ákimi Jeńis Qasymbek barlyq tehnıkany qar qursaýyn joıýǵa barynsha jumyldyrýdy tapsyrdy.

Joldardaǵy qardy tazalaýmen 52 merdiger uıym aınalysady, olarda 800 tehnıka bar, dep habarlady apparat keńesinde jolaýshylar kóligi jáne avtomobıl joldary basqarmasynyń basshysy Áskerbek Haltonov. Onyń aıtýynsha, 95 qar ustaıtyn ýchaskege basa mán berilgen.

Kún saıynǵy daýyldy eskertýlerge qaramastan, adamdar alys saparǵa shyǵýyn toqtatar emes. Oblys joldarynda qutqarý operatsııasy júrgizilýde. Tek sońǵy táýlikte qar keptelisinen 300-den astam adam qaýipsiz jerge jetkizildi.

Oblys ákimi úgit-nasıhat jumystaryn kúsheıtýdi talap etti.

Jeńis Qasymbek sondaı-aq qar jınaýǵa jáne shyǵarýǵa qosymsha tehnıka tartýdy tapsyrdy.

«Sizderde osy jaǵdaıda áreket etý sııaqty jol kartasy bolýy kerek. Jaǵdaı qıyn. Máseleni sheshińizder! Kún saıyn qardy tazalaý jáne shyǵarý kerek - basqa jol joq! Bul jumysty barynsha qarqyndy júrgizý qajet. Shaǵymdar kóp. Árbir turǵyn aýa-raıynyń zardabyn sezindi. Boljamdar da máz emes. Birneshe kún boran men qatty jel kútiledi. Sondyqtan búgin mańyzdy máselelerdiń biri – respýblıkalyq jáne oblystyq mańyzy bar qalalar men joldarda jumys isteý. Qar tazalaý týraly kún saıyn selektorlyq rejimde ár ákimdi tyńdaıtyn bolamyn», - dedi Jeńis Qasymbek.