Qaraǵandy oblysynyń ákimi áıelderdi 8 naýryz merekesimen quttyqtady

QARAǴANDY. QazAqparat – 8 naýryz qarsańynda gúlder, syılyqtar, júrekjardy áńgime – Qaraǵandy oblysynyń ákimdiginde áıelderge arnalǵan quttyqtaýdyń arqaýyna aınaldy. Merekelik basqosýǵa túrli qalalar men aýdandardan erekshe kózge túsken áıelder qaýymy jınaldy. Shaqyrylǵandardyń arasynda muǵalimder men dárigerler, mádenıet jáne sport qaıratkerleri, kásipkerler men polıtseıler, kóp balaly analar bar, dep habarlaıdy QazAqparat tilshisi.

Bıylǵy jyldy Prezıdent balalar jyly dep jarııalady. Kezdesýde bala tárbıesindegi áıeldiń róli jáne anany qoldaýdaǵy memlekettiń mańyzy týraly kóp aıtyldy.

«Biz ne salsaq ta, memleket deńgeıinde ne istesek te, balanyń basty qorǵaýshysy árqashan ana bolady. Sondyqtan áıelderdiń densaýlyǵy men ál-aýqatyna da úlken kóńil bólinedi. 8 naýryz – áıel-anaǵa taǵzym etýdiń bir belgisi. Ana bolý – úlken eńbek. Biz kóp balaly analar sanynyń jyl saıyn ósip kele jatqanyna qýanyshtymyz», – dedi aımaq basshysy.

Búginde Qaraǵandy oblysynda 18 myńnan astam kópbalaly ana turady. Olardyń kópshiligi úı sharýashylyǵymen ǵana emes, sonymen qatar tabysty kásipkerler bolyp, qaıyrymdylyqpen aınalysady.

Dástúr boıynsha kezdesýde kópbalaly analar altyn jáne kúmis alqalarmen marapattaldy.

Altyn marapatqa jeti bala tárbıelep otyrǵan Aınur Safarova ıe boldy. Kúmis alqa Ásel Áýbákirova men Sáýle Tórebekovaǵa tabystaldy. Sondaı-aq, bes áıel Qazaqstan Prezıdentiniń alǵys hattarymen marapattaldy.

Odan ári beıresmı jaǵdaıda Jeńis Qasymbek barlyq jınalǵan názik jandylardy tyńdap, olardy tolǵandyratyn suraqtarǵa jaýap berdi. Áıelder ózderiniń ómirlik jáne kásibı tájirıbelerimen bólisti. Dárigerler vaktsınatsııanyń, ásirese júkti áıelder úshin qanshalyqty mańyzdy ekenin eske saldy. Bul ananyń da, balanyń da densaýlyǵyn saqtaýǵa kómektesedi. Muǵalimder otbasylyq qundylyqtardy saqtaýǵa shaqyrdy. Sonymen birge, barlyǵy bilim berý máselesinde ákeniń de, ananyń da róli birdeı mańyzdy ekendigimen kelisti.

«Deni saý áıel salaýatty urpaq tárbıeleıdi. Men ózim kóp balaly anamyn. Meniń tórt balam bar. Eger árbir kóp balaly ana memleketke degen masyldyq qarym-qatynasty joıyp, ana bolý jaýapkershiliginiń dárejesin túsinip, osy ataqty maqtanyshpen alyp júretin bolsa, onda bizdiń elimizde baqytty otbasylar kóp bolady dep esepteımin», – dep atap ótti Óńirlik isker áıelder keńesiniń tóraıymy Gúlııa Jáńgirova.

«Men osyndaı jaǵymdy is-sharaǵa alǵash ret qatysyp otyrmyn. Bul kezdesý resmı túrde ótýde, degenmen atmosfera jylýlyqqa toly. Qaraǵandy oblysynyń, Qazaqstannyń jáne búkil álemniń áıelderin merekemen quttyqtaımyn. Olarǵa, olardyń balalary men jaqyndaryna densaýlyq tileımin! Jáne de, árıne, beıbit aspan bolsyn», – deıdi Temirtaý murajaıynyń dırektory Natalıa Skorıkova.