Qaraǵandy oblysynyń 17 eldimekeninde bıyl jańa sport nysandary ashylady

QARAǴANDY. QazAqparat – Qaraǵandy oblysynyń ákimi Jeńis Qasymbek halyqqa esep berý kezdesýlerin jalǵastyrýda. Osy joly óńir basshysy Buqar Jyraý aýdanynyń turǵyndarymen kezdesip, onda aýdannyń tynys-tirshiligine qatysty kóptegen túıtkildi máseleler kóterildi, dep habarlaıdy QazAqparat.

Botaqara mádenıet úıinde ótken kezdesýge aýdan ortalyǵynan bólek ózge aýyldardyń turǵyndary da jınaldy. Kezdesýge kelgender aýyl ómirine qatysty ózderin tolǵandyrǵan saýaldardy qoıyp jatty.

Mysaly, Doskeı aýylynan kelgender elektr jelileriniń jaǵdaıyna shaǵymdandy. Bul máseleniń sheshilýi monopolıstiń ınvestıtsııalyq baǵdarlamany iske asyrýyna tikeleı baılanysty.

Qýshoqy turǵyndary dene shynyqtyrý – saýyqtyrý keshenin (DSK) salyp berýdi surady. Basqa aýyldarda da sportpen shuǵyldanatyn oryndar jetispeıdi.

Aýdan ákimi Serjan Aımaqovtyń aıtýynsha, bıyl 17 eldi mekende jańa sport nysandary ashylady, onda kópfýnktsıonaldy hokkeı korttaryn, shaǵyn fýtbol alańdaryn, Workout kóshe alańdaryn ornatý josparlanýda. DSK Botaqara kentinde, Ǵ. Mustafın aýylynda salynady dep kózdelip otyr. Qýshoqy úshin de joba ázirlenbek.

Ǵ. Mustafın kentinde kópirdi jóndeý máselesi birneshe jyl boıy sheshilmegen. Bıyl bıýdjetten qarajat bólinip, jumystar bastalady.

Aýyl klýbyn jóndeý, fızıoterapııa kabınetin jabdyqtaý, mektepke japsarlas ǵımarat salý – bul aýyl turǵyndarynyń ótinishi. Kóptegen suraqtarǵa oblys jáne aýdan ákimi birden jaýap berdi. Keıbireýlerine bir apta ishinde jazbasha jaýaptar beriledi.

«Jalpy Buqar Jyraý aýdany damyp keledi, oń dınamıka bar. Bul jańa úıler men jańartylǵan joldar. Doskeı aýylynda bes qabatty eki úıge kúrdeli jóndeý jumystary júrgizilip, aıaqtalýda, sondaı-aq oblystyq basqarmalar esebinen taǵy úsh úı qalpyna keltiriledi. Aýdanda «Aýyl – El besigi» arnaıy jobasynyń arqasynda aýyldardyń ınfraqurylymy jaqsarýda. Biraq sheshilmegen máseler az emes. Osy kezdesýdiń qorytyndysy boıynsha sizder aıtqan usynystar men eskertýlerdi eskere otyryp, is-sharalar jospary ázirlenetin bolady. Kelesi kezdesýde ne istelgeni týraly esep beremiz», – dep atap ótti Jeńis Qasymbek.

Esep berý kezdesýiniń jańa formaty Buqar Jyraý halqyna unady.

«Men búgin jerlesterimniń problemalary týraly aıtyp berdim. Ákimniń esebine birinshi ret kelip otyrǵan joqpyn. Osyndaı kezdesýler kóp bolýy kerek. Esh jaltaqsyz, ashyq dıalog boldy. Bizdiń máselelerimiz sheshiledi dep úmittenemiz. Halyqqa jaqyn bolý – bul óte jaqsy. Mundaı kezdesýler bılikke degen senimdi arttyrady», – dedi Botaqara kentiniń turǵyny Raýshan Saǵandyqova.

Kezdesýden keıin oblys ákimi jeke máseleler boıynsha da qabyldaý ótkizdi.