Qaraǵandy oblysyndaǵy JES-terde temperatýra kúnine eki ret tekseriledi
Temperatýra rejimi, qazandyqtardyń jumysy, otyn qory týraly derekter atqarýshy organdarǵa kún saıyn 08.00 jáne 16.00-de jiberiledi. Eger energetıka jáne TKSh basqarmasynyń mamandary belgilengen normadan aýytqýshylyqty baıqasa, shuǵyl túrde qyzmet kórsetýshimen baılanysyp, osy máseleni birge sheshedi.
«Saran qalasyna únemi qulaq túre júremiz. Óıtkeni ondaǵy 22 qazandyqtyń barlyǵy jekeniń qolynda. Byltyr 30 gradýs aıaz bolǵanda turǵyndar shaǵymdanǵan. Sol shaǵymdardy eskere otyryp, bıyl taǵy da qaıtalanbas úshin qazandyq ıelerin 50 tonnaǵa deıin sapaly kómir satyp alýǵa mindettedik», - deıdi energetıka jáne TKSh basqarmasynyń basshysy Ulantaı Óskenov.
2017-2019 jyldarǵa arnalǵan jol kartasyna sáıkes, Aqtaý, Aqadyr jáne Shahan qalalaryndaǵy turǵyn úılerdiń jertólesindegi 30 qazandyq bólek ǵımaratqa shyǵarylady. Al Sarandaǵy 117 úıge shaqtalǵan ortalyq qazandyqtyń qurylysyna qajetti joba-smetalyq qujattar ázirlenip, memlekettik saraptamanyń qorytyndysy da shyǵyp úlgergen. Quny 2 mlrd teńgeden asatyn joba 2019 jyly qarjylandyrý úshin QR Ulttyq ekonomıka mınıstrligine jiberildi.
Jalpy, Qaraǵandy oblysynda 8 JES, 67 qazandyq jáne 700 AJJ bar. Olardyń barlyǵy jylý maýsymynyń aldynda daıyn tur degen pasport alǵan. Qazir olar belgilengen jylý rejimimen qalypty jumys istep jatyr.