Qaraǵandy oblysyndaǵy Jartas kólinde balyq qyrylyp jatyr

QARAǴANDY. QazAqparat – Jergilikti balyqshylar Qaraǵandy oblysynyń Qarqaraly aýdanyndaǵy Jartas kólinde balyqtyń jappaı qyrylyp jatqanyn aıtyp, dabyl qaqty. Oblystyq balyq sharýashylyǵyn baqylaý ınspektsııasy men ekologııa departamentiniń mamandary oqıǵa ornyna attandy, dep habarlaıdy QazAqparat tilshisi.

Áleýmettik jelilerde Qarqaraly aýdanyndaǵy Jartas kólinde balyq qyrylyp jatqany týraly vıdeo men sýretter paıda boldy.

Oqıǵa ornyna Nura-Sarysý oblysaralyq basseındik balyq sharýashylyǵy ınspektsııasynyń, balyq sharýashylyǵy ǵylymı-óndiristik ortalyǵynyń, Qaraǵandy oblysynyń tabıǵı resýrstar jáne tabıǵatty paıdalanýdy retteý basqarmasynyń, oblystyq veterınarııa basqarmasynyń jáne ekologııa departamentiniń mamandary attandy.

«1 mamyrda komıssııa oqıǵa ornyna baryp, jalpy salmaǵy 32 kg (tuqy – 27 kg, alabuǵa – 5 kg) balyqtyń qyrylý faktisin anyqtady. Qaraǵandy oblysy boıynsha ekologııa departamenti sý synamalaryn aldy. Qaraǵandy oblysynyń veterınarııa basqarmasymen jáne Qaraǵandy oblysynyń Tabıǵı resýrstar jáne tabıǵatty paıdalanýdy retteý basqarmasymen birlesip, sanıtarııalyq normalardy saqtaı otyryp, ólgen balyqty keıinnen kádege jaratý boıynsha jumystar uıymdastyryldy. Balyqtardyń ólimine sýda erigen otteginiń bolmaýy sebep bolyp otyr degen boljam aıtyldy», - dep habarlady ınspektsııadan.

Jartas kóli Qarqaraly aýdanynda, Qaraǵandydan 300 shaqyrym jerde ornalasqan. Belgili bolǵandaı, sý aıdyny birneshe jyl buryn «Ásel» ShQ-na kól-taýarlyq balyq ósirý sharýashylyǵyn júrgizý úshin bekitilgen bolatyn. Kólemi 200 gektardan asatyn kólde alabuǵa, tuqy jáne móńke balyqtary meken etedi.