Qaraǵandy oblysyndaǵy shahtada besinshi kenshini izdestirý qalaı júrip jatyr

ASTANA. QazAqparat – «Qazaqstan» shahtasynda jergilikti órt oshaqtaryn sóndirý toqtatylyp, besinshi kenshini izdestirý jumystary kúsheıtildi, dep habarlaıdy QazAqparat Tótenshe jaǵdaılar mınıstrliginiń baspasóz qyzmetine silteme jasap.

Málim etilgendeı, Tótenshe jaǵdaılar mınıstri Syrym Sháriphanov «Qazaqstan» shahtasynda izdestirý-qutqarý jumystarynyń barysyn turaqty baqylaýda ustap otyr.

Saǵat 18:14-te iz-túzsiz bolǵan tórtinshi adam tabyldy. Ol taý-ken qutqarý vzvody komandıriniń orynbasary Samat Shoshımov basshylyq etetin eki bólimsheniń kúshimen tabyldy.«Kásibı áskerılendirilgen avarııalyq-qutqarý qyzmeti» respýblıkalyq ortalyq shtabynyń bólimsheleri 5-shi kenshiniń boljamdy ornalasýy baǵytynda D-6 konveıerlik betkeıinde joǵarydan tómen qaraı izdestirýdi jalǵastyryp jatyr.Іzdestirý jumystary apatty ýchaskeniń tolyq túnim basýymen, joǵary temperatýramen (65 gradýs) jáne úıindiler túrindegi kedergilermen qıyndaýda. Joǵarydan tómen qaraı 170 metr júrip ótildi.Jergilikti órt oshaqtaryn sóndirý jumystary toqtatyldy, barlyq kúsh-jiger izdestirýge baǵyttalǵan

, - delingen TJM habarlamasynda.

Eske salaıyq, Qaraǵandy oblysyndaǵy «Qazaqstan» shahtasynda órt 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

5 jumysshynyń taǵdyry belgisiz boldy. 3 adamnyń denesi tabylyp, aty-jóni jarııalanǵan edi. Búgin, 19 tamyzda tórtinshi jumysshynyń denesi tabyldy.

18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.

Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etkendeı, «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin.

Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.