Qaraǵandy oblysynda jylyjaı ustaıtyn kásipker kúnine bir tonna qııar jınaıdy

QARAǴANDY. QazAqparat – Kún saıyn derlik kásipker Batyr Dármenov Qaraǵandy naryǵyna óz qolymen ósirilgen qııar satady. Onyń Buqar Jyraý aýdany Trýdovoı aýylynda eki jylyjaıy bar, dep jazady QazAqparat tilshisi.

Batyr Dármenov Ózbekstanda dúnıege kelgen. 2006 jyly Qaraǵandyǵa kóship kelip, «Shyǵys» bazarynda kókónis pen jemisi satýshy bolyp jumys isteı bastaǵan. Ýaqyt óte kele ol óz bıznesin bastaý týraly sheshimge keledi.

«Men óz-ózime jumys istegim keldi. Internetten jylyjaıda kókónisterdi qalaı ósirýge bolatynyn meńgere bastadym, dostarymnan suradym. Meniń dostarymnyń Shymkentte jylyjaılary bar. Biraq, Qaraǵandy oblysyndaǵy aýa raıynyń qolaısyzdyǵyna qaramastan, 2018 jyly osy jerde bıznes ashýǵa bel býdym», – deıdi Batyr Dármenov.

Bastapqyda kásipker 2,25 ga jerdi jalǵa alǵan. Agrarlyq nesıe korporatsııasy jobany qarjylandyrdy. Al Batyr jergilikti sharýa qojalyǵynan qaryz aldy. Osylaısha jarty gektarǵa alǵashqy jylyjaıdyń qurylysy bastaldy. Bıznesin jańa bastaǵan kásipker ony tamshylatyp sýarýdyń avtomatty júıesimen jabdyqtap, eki jylytý qazandyǵyn ornatty.

Ónimge suranys joǵary bolǵandyqtan Batyr ekinshi jylyjaıdy salǵan. Taǵy da nesıe alýǵa týra keldi. Kovıdtik shekteýler kóptegen qıyndyqtar ákeldi. Biraq 100 sotyqqa jýyq taǵy bir jylyjaı salyndy. Degenmen ol osy jyldyń basynda ǵana iske qosyldy.

«Búgin men tanto sortynyń qııaryn ósirý úshin gıdroponıka men mıneraldy júndi de qoldanamyn. Tuqym túrin de kezdeısoq tańdaǵan joqpyn. Tanto – ónimdiligi joǵary jáne dámi jaqsy erte pisetin gıbrıd. +5-6 gradýsta 20 kúnge deıin saqtalady. Men eń aldymen adamdar úshin jumys isteımin, sondyqtan olardyń ústeline jaqsy sapaly ónimder keledi. Men eshteńeni únemdemeımin – sýarýǵa da, jylyjaılarda qajetti klımat qurýǵa barynsha qarajat jumsaımyn», – deıdi kókónis ósirýshi.

Jylyjaılardaǵy kóshetter jylyna eki ret otyrǵyzylady, al ónim jylyna 8–9 aı jınalady. Qysta kúnine bir tonnaǵa deıin qııar jınaýǵa bolady. Jylyjaılarda maýsymǵa baılanysty 20-dan 25 adamǵa deıin jumys isteıdi.

Ónimniń negizgi bóligi Qaraǵandyda kóterme satyp alýshylarǵa satylady. Biraq klıentter Astana, Pavlodar, Petropavl qalalarynan da keledi.

«Eki jylyjaıda jylyna 400–450 tonnaǵa deıin ónim jınaýdy josparlap otyrmyz. Biraq bul joly sýyq óte erte tústi, sondyqtan ne bolatynyn bilmeımiz. Eń bastysy – jer bar. Jańa jylyjaılar men kóshetterdi ósirýge arnalǵan bólek bólme salý josparlanýda. Qyzanaq otyrǵyzý ıdeıasy bar, biraq bári qarjyǵa kep tireledi. Ázirge aıaǵymyzǵa myqtap turǵymyz keledi», – deıdi Batyr Dármenov.