Qaraǵandy oblysynda jyl sońyna deıin úsh ózen tazartylady

QARAǴANDY. QazAqparat – Qaraǵandy oblysynda jeltoqsanǵa deıin Nura, Aqbastaý jáne Solonka ózenderin sanatsııalaý jumystary aıaqtalmaq. Bul jobalar 2021-2023 jyldarǵa arnalǵan sý tasqyny qaýpin azaıtý jónindegi respýblıkalyq jol kartasy sheńberinde qaralǵan, dep habarlaıdy QazAqparat tilshisi.

Qazirgi tańda Qaraǵandy oblysynda Temirtaý qalasy, Chkalovo jáne Sadovoe aýyldary mańynda Nura ózenin qalpyna keltirý jumystary júrgizilip jatyr. Sondaı-aq, Osakarov aýdanynda uzyndyǵy 3,5 km Aqbastaý ózeni, Qaraǵandy qalasynyń Rabochıı kentinde uzyndyǵy 7,2 km Solonka ózeni sanatsııalanady. Bul jobalar Qaraǵandy oblysynyń tabıǵı resýrstar jáne tabıǵat paıdalanýdy retteý basqarmasynyń baqylaýymen júrgizilip jatyr.

Sonymen qatar, Nura ózeninde jol kartasynan tys jumystar da júrgiziledi: Ǵ. Mustafın kentinen Samarqand sý qoımasynyń kireberisine deıingi uzyndyǵy 4,2 km arna ýchaskelerin jáne Shahterskoe aýyly men Baıtýǵan aýyly arasyndaǵy uzyndyǵy 17,2 km ózen ýchaskelerin sanatsııalaý iske asyryla bastady.

Nura ózeniniń Q. Sátbaev atyndaǵy kanalynyń uzyndyǵy 2,4 km aýdanyndaǵy ýchaskesinde sanatsııa júrgizýge konkýrstyq rásimder aıaqtaldy. Injenerlik jumystardyń oblystyq jospary boıynsha bıyl 5,8 km qorǵanys bógetteri men bilikteri turǵyzylyp, nyǵaıtyldy, ózen arnalarynyń 14,5 km sý tasqyny qaýpi bar ýchaskelerine sanatsııa júrgizildi, 13,9 km drenajdyq jáne sý burý júıeleri tazartyldy. Avtomobıl joldarynyń tórt ýchaskesinde sý ótkizý qabileti ulǵaıtyldy, 5 sý sharýashylyǵy qurylysy jóndeldi.

Oblysta 2015-2022 jyldar aralyǵynda barlyǵy 260,1 km qorǵanys bógetteri men bilikter turǵyzylyp, nyǵaıtyldy, 120 km ózen arnalaryn qorǵaý jáne túbin nyǵaıtý, túzetý jáne keńeıtý jumystary júrgizildi.