Qaraǵandy oblysynda júk poıyzy qaǵyp ketken áıel kóz jumdy

QARAǴANDY. QazAqparat - Qaraǵandy oblysynyń Topar kentiniń mańynda júk poıyzy áıel adamdy qaǵyp ketti. Ol alǵan jaraqatynan oqıǵa ornynda mert boldy, dep habarlaıdy QazAqparat tilshisi.

Qaıǵyly oqıǵa Qaraǵandy oblysyna qarasty «Qarabas-Topar» ótkelinde bolǵan.

«10 sáýirde atalǵan fakti Qaraǵandy-Suryptaý stantsııasyndaǵy jelilik polıtsııa bóliminde QR Qylmystyq kodeksiniń 344-baby 2-bóligi, ıaǵnı, «Abaısyzda adam ólimine ákep soqqan temirjol kóligi qozǵalysynyń qaýipsizdik qaǵıdalaryn buzý« boıynsha tirkeldi. Qazirgi ýaqytta is boıynsha tıisti tergeý amaldary júrgizilip jatyr», - dep habarlady Qaraǵandy oblysynyń kóliktegi polıtsııa departamentiniń baspasóz qyzmeti.

Sondaı-aq vedomstvo atalmysh is boıynsha basqa aqparat QR Qylmystyq is júrgizý kodeksiniń 201-babynyń talaptaryna sáıkes tergeý múddesine oraı jarııalaýǵa jatpaıtynyn málimdedi.

Aıta ketý kerek, ótken aptada dál osyndaı qaıǵyly oqıǵa Balqash qalasynda bolǵan edi.