Qaraǵandy oblysynda jol apatynan eki adam kóz jumdy

QARAǴANDY. QazAqparat – 21-ne 22 aqpanǵa qaraǵan túni Qaraǵandy oblysynda jol apatynan eki adam qaza tapty. Avtokólikterdiń soqtyǵysýyna aýa raıynyń kúrt nasharlaýy sebep bolǵan. Óńirde túnde kóktaıǵaq bolyp, jel kúsheıe tústi, dep habarlaıdy QazAqparat tilshisi.

Birinshi apat 21 aqpan saǵat 08.45-te Abaı qalasynan 5 km qashyqtyqtaǵy Qyzylorda-Pavlodar tas jolynda oryn aldy. Nissan Note kóligi «PAZ 320530-02» jumys avtobýsymen soqtyǵysqan.

Nátıjesinde Nissan Note kóliginiń 39 jastaǵy júrgizýshisi alǵan jaraqatynan qaıtys boldy. Avtobýsta zardap shekkender joq.

Sonymen qatar, sol kúni saǵat 20.50-de Almaty-Ekaterınbýrg tas jolynda Qaraǵandydan 25 km qashyqtyqta 32 jastaǵy Toyota Corolla avtokóliginiń júrgizýshisi rýldi basqara almaı, qarsy qozǵalys jolaǵyna shyǵyp, 38 jastaǵy er adamnyń basqarýyndaǵy Volkswagen Passat jeńil avtokóligimen soqtyǵysqan.

«Apat saldarynan Toyota Corolla júrgizýshisi alǵan jaraqattarynan oqıǵa ornynda qaıtys boldy. Volkswagen Passat júrgizýshisi jáne osy kóliktiń salonynda bolǵan eki jolaýshy medıtsınalyq mekemege jetkizildi. Atalmysh faktiler polıtsııada tirkeldi, tıisti saraptama taǵaıyndalǵan, onyń nátıjesi boıynsha protsessýaldy sheshim qabyldanady», - dep habarlady Qaraǵandy oblysy PD baspasóz qyzmeti.

Jalpy, bir táýlik ishinde Qaraǵandyda 24 jol-kólik oqıǵasy boldy. Barlyq jaǵdaıda júrgizýshiler jol qozǵalysy erejesin saqtamaǵan.

Polıtseıler jol qozǵalysyna qatysýshylardy jyldamdyq rejımin, qaýipsiz qashyqtyqty, burylý erejelerin qatań saqtaý týraly eskertedi.

Kóktaıǵaq jaǵdaıynda kólik quraldarynyń júrgizýshileri kenetten manevr jasamaýy jáne tejemeýi tıis.

Al jaıaý júrginshiler joldan ótý kezinde jaqyndap kele jatqan avtokóliktiń toqtaǵynyna kóz jetkizýi kerek.