Qaraǵandy oblysynda jetekshi shahterler men tálimgerler marapattaldy

QARAǴANDY. QazAqparat - Kenshiler kúni qarsańynda «ArselorMıttal Temırtaý» AQ Kómir departamentinde úzdik jumysshylar marapattaldy. Vedomstvolyq tósbelgiler 55 adamǵa tabys etildi. Eńbek sińirgen shahterlerge «Jyl tálimgeri» ataǵy berilip, estelik kádesyılar tabys etildi, dep habarlaıdy QazAqparat tilshisi.

Marapattaý rásimi sanıtarlyq talaptardy saqtaı otyryp ótti. Departament basshylary áriptesterin quttyqtap, eńbegi, kásibıligi men isine adaldyǵy úshin alǵys bildirdi.

Jer asty jáne jer ústi kásiporyndarynyń qyzmetkerlerine «Shahter dańqy», «Kenshi dańqy» jáne «Shahterskaıa slava» belgileri tabys etildi. Marapat alǵan kenshiler belgimen qosa aqshalaı syılyq aldy.

Bıyl kompanııada «Jyl tálimgeri» ataǵyn berý dástúri quryldy.

Onyń alǵashqy ıegerleriniń biri, taý-ken montajshysy Valter Patser «Shahtınskaıa» shahtasynda 40 jyldan astam eńbek etedi.

«Jas kenshilerdi qaýipsiz jumys isteýge, asyqpaýǵa, barlyǵyn durys jáne sapaly jasaýǵa úıretemin. Tájirıbe almasý kerek. Aýysymdy daıyndaý mańyzdy, bul bizdiń bolashaǵymyz», - dep bólisti ol.

«Shahter dańqynyń» tolyq kavaleri «Tentek» shahtasynyń taý-ken qazbalaryn jóndeý ýchaskesiniń bastyǵy Igor Krylov boldy.

«Bul bizdiń ortaq marapatymyz. Meniń ákem osy shahtada jumys istedi, men 35 jyldan beri jumys istep kelemin. Bul kásiporyn meni kóptegen jaqyn adamdarymmen baılanystyrdy», - dep esepteıdi ol.

III dárejeli «Shahter dańqy» tósbelgisimen Rınat Garıfýllın marapattaldy. Qyryq jyldan astam ýaqyt boıy ol «Qazaqstan» shahtasynda eńbek etedi.

Kompanııada kenshiler áýletteri de atap ótildi. Syılyqtar men aqshalaı sertıfıkattar tabys etildi.