Qaraǵandy oblysynda JEO-lardyń tútin qubyrlary tekseriledi
Oblys ákimdiginde jylytý maýsymy qalaı aıaqtalyp jatqany jáne kelesi maýsymǵa daıyndyq jaıly aıtyldy.
Energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Nurjan Naqypbekovtyń aıtýynsha, ótken kúzgi-qysqy kezeńde eleýli tehnologııalyq buzýshylyqtar bolmaǵan. Jylýdyń jetkiliksiz bolǵan jaıttary jabdyqtardyń qanaǵattanarlyqsyz jaǵdaıymen baılanysty.
Kelesi jylytý maýsymyn turaqty ótkizý úshin jylý nysandarynyń ıeleri jańǵyrtý men jóndeýge 22 mlrd teńge bóledi.
«Segiz stantsııada 17 qazandyq pen 9 týrbınany kúrdeli jóndeý josparlanǵan. 32 qazandyq pen 22 týrbınanyń aǵymdaǵy jóndeýi keńeıtildi. Osy jyldan bastap Jezqazǵan JEO-da bir qazandyq jáne Topar JEO-da bir týrbına aýystyrylady. «ArselorMıttal Temirtaý» AQ JEO-2-de eki qazandyq pen bir týrbınany kúrdeli jóndeý jumystary josparlanǵan», – dedi Nurjan Naqypbekov.
Atqarylǵan jumystar men josparlar týraly jylý kózderiniń basshylary esep berdi. Kestege sáıkes, barlyq JEO-da jóndeý jumystary osy aıda bastalady.
«Biz qandaı qıyn jaǵdaıda jumys istesek te, turǵyndar jylý berý kezeńinde sapaly qyzmet alýy tıis. Bıylǵy jyldy biz aıaqtaımyz. 15–20 kún qaldy. Kelesi jyldyń jylytý maýsymyna barynsha daıyndalýymyz kerek. Jaqsy oılastyrylǵan jóndeý naýqany qajet», – dedi oblys ákimi Jeńis Qasymbek.
Óńir basshysy energııa baqylaý departamentine jylý kózderindegi jóndeý jumystarynyń sapasyn qadaǵalaýdy, al JEO basshylaryna – barlyǵyn merziminde bastaýdy jáne jabdyqtardyń ýaqytyly jetkizilýin qamtamasyz etýdi tapsyrdy.