Qaraǵandy oblysynda Jeńis kúni qalaı toılanady

QARAǴANDY. QazAqparat - Elimizde tótenshe jaǵdaı rejımi jarııalanýyna baılanysty jappaı serýenge jáne sherýge tyıym salynǵan. Jeńis kúnin atap ótý, onyń ishinde «Er esimi - el esinde» sharasy alǵash ret onlaın rejımde ótedi, dep habarlaıdy QazAqparat tilshisi.

9 mamyrda oblystyń barlyq LED-ekrandarynda Uly Otan soǵysy ardagerleriniń fotosýretteri bar beınerolıkter men slaıd-shoý kórsetiledi. Maıdanda shaıqasqan jáne tylda eńbek etkenderdi áleýmettik jelilerde de ardaqtaýǵa bolady.

Sáýir aıynan bastap oblysta «Er esimi - el esinde» keń aýqymdy ınternet-jobasy iske qosyldy. «Saryarqa aqparat» medıaholdınginiń jáne «EKaraganda» qalalyq portalynyń alańynda (ekaraganda.kz/9may) ata-babalarymyzdyń fotosýretteri jáne olardyń qysqasha ómirbaıany jınaqtalyp, jarııalanady.

Sondaı-aq, áleýmettik jelilerde 3 myńnan astam adam qatysqan «Jeńis lentasy» chellendji iske qosylady.

Barlyq qalalar men aýdandardyń ákimderi ardagerlerdiń ózderin jeke quttyqtaıdy.

Uly Otan soǵysyna qatysqandarǵa jáne tyl eńbekkerlerine Jeńis kúnine oraı tólemder qarastyrylǵan. Uly Otan soǵysynyń ardagerleri men múgedekteri mıllıon teńgeden aldy. Kontslagerler men qorshaýdaǵy tutqyndar tiziminde bolǵan 101 adam 200 myń teńgeden alady. Sondaı-aq, Aýǵan soǵysy ardagerlerine 596 teńge tólendi. Chernobyl AES apatyn joıýshy 598 adamǵa 100 myń teńgeden berildi. 8 778 tyl ardageri jáne Uly Otan soǵysynda qaza tapqan jaýyngerlerdiń jesirleri 50 myń teńgeden aldy.

Óńirlik ákimdikterge Memleket basshysynyń atynan soǵys ardagerlerine quttyqtaý haty kelip tústi.

Qaraǵandy oblysynda 64 soǵys ardageri turady.