Qaraǵandy oblysynda jastarǵa arnalǵan arnaıy telegram-bot jumys isteıdi

QARAǴANDY. QazAqparat - Qaraǵandy oblysynyń jastar resýrstyq ortalyǵy Telegram messendjer platformasynda JasProKrg botyn qurdy. Ol jastarǵa jumysqa ornalasý, vaktsınatsııa, volonterlik jáne debattyq qozǵalystar, isin jańa bastaǵan kásipkerlerdi qoldaý jáne t. b. týraly ózekti suraqtarǵa jaýap alýǵa kómektesedi, dep habarlaıdy QazAqparat óńir ákimdiginiń resmı saıtyna silteme jasap.

Aı saıyn bot jańa aqparatpen tolyqtyrylady.

– Jastar úshin aqparattyń negizgi kózi áleýmettik jeliler bolyp tabylatyny týraly naqty túsinik bar, – deıdi jastar saıasaty jónindegi basqarma basshysy Birjan Álimjanov. – Kóbinese olardyń fýnktsıonaldyǵy jarııalanymdarmen jáne túsiniktemelerde hat almasýmen shekteledi. Jastarǵa túrli baǵyttar boıynsha aqparattyń qoljetimdiligin qamtamasyz etý úshin ótken jyldyń kókteminde bot quryldy. Onyń múmkindikteri mol. Olardyń qatarynda oblys boıynsha jastar resýrstyq ortalyqtarynyń baılanys derekterin usyný qyzmeti bar.

Paıdalanýshylar bastapqy menıýden olardy qyzyqtyrǵan bólimge ótip, tolyǵyraq aqparat ala alady. Qazirgi ýaqytta bot volonterlik qozǵalysqa qosylýǵa múmkindik beredi. Siz ózińizdiń erikti uıymyńyzdy tirkeı alasyz nemese burynnan bar uıymǵa qosyla alasyz.

Osy jerde qandaı da bir is-sharany ótkizý úshin kovorkıng-ortalyqqa ótinim qaldyrýǵa bolady

Basqarmanyń barlyq iri jobalary týraly aqparat ta jalpyǵa ortaq usynylyp, onymen tanysý úshin yńǵaıly ornalastyrylǵan. Olardyń arasynda Qaraǵandy oblysy ákiminiń granttary da bar.

Birjan Álimjanovtyń aıtýynsha, bottyń negizgi qyzmeti jumysqa ornalastyrý týraly bólim bolyp tabylady. «Jastar praktıkasy», «Dıplommen – aýylǵa!», «Alǵashqy jumys orny», «Jasyl el», «Qoǵamdyq jumystar» jastarǵa ýaqytsha da, turaqty da jumys tabýǵa múmkindik beredi.

Bottyń basty artyqshylyǵy – ony paıdalaný ońaı, ári mobıldi jáne jumys ústeliniń barlyq platformalarynda qol jetimdi.

Sondaı-aq, Telegramda JasProKrg_chat quryldy, onda siz suraq qoıyp, mamandardyń tolyq jaýabyn ala alasyz.