Qaraǵandy oblysynda jas kásipker memlekettik grantqa aýyldan kınozal ashty

QARAǴANDY. QazAqparat – Qaraǵandy oblysy Jańaarqa aýdanynyń turǵyny aýdan ortalyǵynda kınozal ashty. Osylaısha jas kásipker aýyl turǵyndaryna bos ýaqytyn kóńildi ótkizýge jaǵdaı jasamaq, dep habarlaıdy QazAqparat tilshisi.

Salamat Iken týǵan aýyly Jańaarqa aýdanynda kınozal ashty. Onda jergilikti turǵyndar fılm tamashalap qana qoımaı, dámdi tamaqtana alady.

25 jastaǵy kásipker «Bastaý bıznes» jobasy boıynsha oqýdan ótti. Qajetti bilim alǵan jas jigit jergilikti turǵyndar úshin tátti gúl shoqtaryn shyǵara bastady.

Alaıda, aýylda shokolad gúlderi men basqa da kondıterlik taǵamdarǵa degen suranys tek mereke kúnderinde ǵana bolady, sondyqtan Salamat kınokafe ashýǵa sheshim qabyldaǵan.

«Bıznes-jospar jasap, aýdan ákiminiń grantyna ótinim berdim. Baıqaýdan ótip, 500 myń teńge aldym. Óz qarajatymdy qosyp, proektor men basqa da qajetti jabdyqty satyp aldym. Kınokafe ǵımaratyn dosym Álibekpen birge jalǵa alamyz. Men kelýshilerge fılm kórsetemin, al dosym olardy tamaqtandyrady», – deıdi kásipker.

Kınokafe jaqynda ashylǵanyna qaramastan, turǵyndar arasynda óte tanymal.

«Kıno kórý úshin bizge balalar da, eresekter de keledi. Bolashaqta ekinshi zal ashamyz degen oı bar. Men ózime kómekshi alýdy josparlap otyrmyn», – deıdi Salamat.