Qaraǵandy oblysynda TJ rejımin buzǵan 43 adam qamaýǵa alyndy

QARAǴANDY. QazAqparat – Qaraǵandy oblysynda qoǵamdyq-saıası jaǵdaı turaqty. Oblys komendanty Erlan Faızýllınniń aqparaty boıynsha, ótken táýlikte polıtseıler 13 qylmystyq quqyq buzýshylyqty anyqtady, dep habarlaıdy QazAqparat tilshisi.

Tótenshe jaǵdaı rejımin buzǵany úshin 43 adam ákimshilik qamaýǵa alyndy. Toǵyz buzýshyǵa aıyppul salyndy, 335 eskertý jasaldy.

Polıtsııa qyzmetkerleri 21 tyıym salynǵan zatty, onyń ishinde 13 dana tegis uńǵyly qarýdy tárkiledi. Esirtki zattaryn saqtaýdyń 6 faktisi anyqtaldy.

TJ rejımi kezinde polıtsııa bólimderine 5 sheteldik azamat jetkizildi. Olardyń keıbiri erekshe rejım talaptaryn buzǵany úshin 10 táýlikke qamaýǵa alyndy. Ekeýi kóshi-qon zańnamasyn buzǵany úshin jaýapkershilikke tartyldy. Eki sheteldik sot sheshimi shyqqanǵa deıin arnaıy qabyldaý ornyna ornalastyryldy.

Esterińizge sala keteıik, Qaraǵandy oblysynda quqyqtyq tártipti qamtamasyz etý úshin barlyq polıtsııa qyzmetkerleri, Ulttyq ulan men QR Qorǵanys mınıstrliginiń áskerı qyzmetshileri kúsheıtilgen rejımde qyzmet atqarýǵa kóshirildi.