Qaraǵandy oblysynda týrızm qalaı damyp jatyr

QARAǴANDY. QazAqparat – Qaraǵandy oblysy 2022 jyly 360 myńnan astam týrısti, onyń ishinde 16 myńǵa jýyq sheteldikterdi qabyldady. Bıylǵy jyly kórsetkish budan da joǵary bolady dep kútilýde. Ol úshin jaǵdaı jasalýda: demalys oryndary abattandyrylýda, Almaty men Astanadan Balqashqa kúndelikti reıster uıymdastyryldy. Sonymen qatar, oblys turǵyndarynyń ótinishi boıynsha Qaraǵandy – Balqash poıyzyna taǵy eki vagon qosyldy, dep habarlaıdy QazAqparat tilshisi.

Oblys ákimdigi apparatynyń jıynynda týrızmdi damytý jóninde Kásipkerlik basqarmasynyń basshysy Dastan Qudabaev baıandady.

Onyń aıtýynsha, Balqashta – 68, Qarqaraly aýdanynda 15 demalys orny bar.

«Týrızmdi damytýdyń negizgi núkteleri – Balqash kýrorttyq aımaǵy men Qarqaraly ulttyq tabıǵı saıabaǵy. Balqashta abattandyrý, ınfraqurylym salý jáne týrıster úshin jaǵdaıdy jaqsartý máseleleri boıynsha syrttaǵy jıyn ótti. Bertis shyǵanaǵyndaǵy týrıstik nysandarǵa elektr jelilerin tartý, sý jáne káriz júıesimen qamtý jumystary aıaqtaldy. Bıyl qala jaǵalaýyn abattandyrý jumystary bastaldy», – dedi Dastan Qudabaev.

Shilde aıynda Balqashta JasArtsFest mýzyka festıvali ótedi. Jáne de múmkindigi shekteýli jandardyń qatysýymen «Rýh jelkenderi» regatasy josparlanǵan.

Qarqaraly óńirinde týrızm salasyn damytýdyń Jol kartasyn ázirleý bastaldy. Kásipkerlik basqarmasy basshysynyń aıtýynsha, bul ispen Ýrbanıstıka ortalyǵy aınalysyp jatyr.

«Jol kartasynda Qarqaraly bógetiniń irgeles aýmaqtaryn, Qaratóbe ýchaskesindegi toǵandy abattandyrý, Qarqaralydan Buǵyly shatqaly men Úlken kól kýrorttyq aımaqtaryna elektr jelilerin, avtomobıl jolyn, sý qubyry men káriz júıesin tartý jumystary qarastyrylǵan», – deıdi Dastan Qudabaev.

Qala mańyndaǵy týrızmdi damytýǵa da kóńil bólinýde. Qaraǵandy tóńireginde demalysqa arnalǵan 75-ke jýyq oryn bar. Abaı aýdany, Topar aýylyndaǵy qoǵamdyq jaǵajaıdy jabdyqtaý josparlanýda.

Bıyl oblysta týrızm salasynda 8 ınvestıtsııalyq joba júzege asyrylýda: Balqash qalasynda, Qarqaraly, Buqar jyraý jáne Nura aýdandarynda.

«Týrıstik áleýetti damytý úshin jol boıyndaǵy servıstik nysandardyń jetispeıtin ınfraqurylymyn salý qajet. Demalýshylardyń qaýipsizdigine erekshe nazar aýdarylady», – dedi oblys ákimi Ermaǵanbet Bólekpaev.