Qaraǵandy oblysynda turǵyn úıde bolǵan órtten alty adam kóz jumdy
«16 jeltoqsan kúni saǵat 01:51-de Temirtaý qalasynyń Aqtaý kentindegi (jaqyn jerdegi órt sóndirý bóliminen 27 shaqyrym jerde) 5 qabatty turǵyn úıde órt shyqqany týraly habar tústi. Alǵashqy órt sóndirý bólimi oqıǵa ornyna 02:25-te jetti. 1-qabattaǵy 3 bólmeli páterde 40 sharshy metr aýmaqta órt shyqqan. Tótenshe jaǵdaılar departamentiniń bólimsheleri jetkenge deıin turǵyndar 5 adamnyń máıitin (2007, 2010 jyly týǵan uldar, 1983, 1991 jyly týǵan áıelder, 1991 jyly týǵan er adam) kireberisten kóshege alyp shyqqan. Zardap shekken adamdar joǵarǵy qabattardaǵy páterlerden tútin basqan kireberis arqyly ózdiginen evakýatsııalanbaq bolǵan.
Baspaldaq alańy janbaǵan, alaıda tútinniń kóp mólsherdegi kontsentratsııasy saldarynan turǵyndar dalaǵa shyǵyp úlgermegen», - dep habarlady QR TJM Órtke qarsy qyzmet komıtetiniń tóraǵasy Nurbolat Derbisov.
Keıinnen barlaý jáne janyp jatqan páterdegi órtti sóndirý barysynda altynshy adamnyń (1977 jyly týǵan er adam) denesi tabyldy. Úsh adam aýyrlyǵy ortasha túrli deńgeıdegi dene jaraqattaryn alǵan. Sondaı-aq órt sóndirýshiler baspaldaq pen tynys alý apparatynyń kómegimen tútin basqan páterdiń kireberisinen 10 adamdy, onyń ishinde 4 balany qutqardy. Órt 03:10-da oqshaýlanyp, 04:00-de sóndirildi.
Órtti sóndirýge Qaraǵandy oblysy Tótenshe jaǵdaılar departamentiniń 16 qyzmetkeri men 4 tehnıkasy jumyldyryldy.
«Órttiń shyǵý sebebi anyqtalyp jatyr. Oqıǵa ornynda synaq órt zerthanasynyń mamandary men tergeýshiler jumys isteýde. Órt faktisi boıynsha polıtsııa qyzmetkerleri QR Qylmystyq kodeksiniń 292-baby boıynsha qylmystyq is qozǵady», - dep atap ótti mınıstrliktiń baspasóz qyzmeti.
Foto: Qaraǵandy oblysy TJD baspasóz qyzmeti