Qaraǵandy oblysynda «Týǵan jer» arnaıy jobasyna 1,5 mln adam qatysty

QARAǴANDY. QazAqparat - Sońǵy eki jyl ishinde «Rýhanı jańǵyrý» baǵdarlamasynyń «Týǵan jer» arnaıy jobasy sheńberinde 400-ge jýyq is-sharalar men jobalar iske asyryldy, dep habarlaıdy QazAqparat tilshisi.

«Týǵan jer» - qazaqstandyqtardy týǵan ólkesin jandandyrýǵa jáne damytýǵa jumyldyrý, áleýmettik máselelerdi sheshýge baǵyttalǵan joba. Arnaıy joba iske qosylǵan sátten bastap Qaraǵandy oblysynda 2,8 mlrd teńge somaǵa 378 joba men is-shara júzege asyryldy. Bul sharalarǵa óńirdiń 1,5 mıllıonǵa jýyq turǵyny qatysty.

«Rýhanı jańǵyrý» uǵymyn durys túsiný kerek. Kóptegen qazaqstandyqtar ony kezekti memlekettik baǵdarlama retinde qabyldaıdy. Jáne strategııalyq baǵdarlama dep oılaıdy. Bul qate pikir. Rýhanı jańǵyrý-bul ár qazaqstandyqtyń boıynda jaqsy qasıetterdi, patrıotızm men elimizdi órkendetýge tárbıeleý. Ony belgili bir merzimde oryndalýy tıis mindetti baǵdarlama retinde qabyldaýdyń qajeti joq. Bul uzaq merzimdi baǵdarlama. Otanymyz úshin jasap jatqan barlyq nárse júrekten shyǵýy kerek. Eger de Siz óz balalaryńyzdy qoqys tastamaýǵa, ol qoqysty arnaıy jáshikterge jınaýǵa úıretseńiz de, bul "Týǵan jer" baǵdarlamasyna qosqan úlesińiz dep bilý kerek, - deıdi «Rýhanı jańǵyrý» aımaqtyq jobalyq keńsesiniń jetekshisi Gúlnar Qurbanbaeva.

«Týǵan jer» arnaıy jobasynyń aıasynda Qaraǵandy oblysynyń damýyna jergilikti kásipkerler de úlken úles qosýda. Olardyń kómegimen saıabaqtar men gúlzarlar abattandyryldy, aýlalarda balalar alańdary ornatyldy, belgili tarıhı jáne áıgili tulǵalardyń qurmetine eskertkishter men monýmentter qoıylyp, qalalar men aýdandarda sporttyq keshender, saýyqtyrý ortalyqtary jóndeldi jáne salyndy, sondaı-aq birqatar qaıyrymdylyq aktsııalar men is-sharalar uıymdastyryldy jáne ótkizildi.

Baǵdarlamaǵa 245 kásipkerlik qyzmet sýbektileri qatysty, onyń ishinde 137 jeke kásipker, 16 sharýa qojalyǵy, 92 iri jáne orta bıznes sýbektisi bar. Olardyń kómegimen Balqash qalasynda saýyqtyrý basseıni paıda boldy, ol balalar men múgedekter úshin tegin. Jaqynda kásipkerler Qaraǵandy qalasynyń mańynda velotrek salýdy josparlap otyr. Bul iri jobalardyń tek az ǵana bóligi. Aýqymdy jobalardan basqa, arnaıy joba aıasynda aı saıyn týǵan ólkeni jaqsartý boıynsha ondaǵan is-sharalar ótkiziledi.