Qaraǵandy oblysynda sút zaýyty 10 jyldan keıin qaıta iske qosylady
Jańaarqa aýdanynyń Atasý kentinde 2006 jyly irgetasy qalanǵan sút zaýyty 11 jyldan beri birde-bir ónim óndirmegen. Kásiporyn memlekettiń 63 mln teńgesine turǵyzylǵan jáne ol tolyǵymen zamanaýı qondyrǵylarmen jabdyqtalǵan.
63 mln teńgeni zaýytqa «Agrarlyq nesıe korporatsııasy» bólgen. Alaıda onyń jumysyn jolǵa qoıý úshin bıznes-josparda aınalymǵa aqsha qarastyrylmapty. Osynyń saldarynan zaýyt iske qosylmaı, áli kúnge turalap tur. Al qojaıyndary alǵan qaryzdaryn qaıtarýda.
«Agrarlyq nesıe korporatsııasyna» 20 mıllıondaı qaryzymyz qaldy. Ony jańa jylǵa deıin basqa sharýashylyqtardyń esebinen jabamyz degen oıymyz bar. 2018 jylǵa osy Jańaarqadaǵy «Agrarlyq nesıe seriktestiginen» úsh adam nesıe alyp, osy zaýytty ári qaraı iske qosamyz degen oı bar», - deıdi sút zaýytynyń quryltaıshysy Baǵlan Saljanov.
Al aýyl sharýashylyǵy bóliminiń basshysy kásiporynnyń jumysyn jolǵa qoıý úshin shamamen 50 mln teńgedeı qarjy kerektigin aıtady.
Kásiporyn qojaıyndary nesıe alǵanda barlyq dúnıe-múlkin kepildikke qoıǵan. Jergilikti bılik ókilderi qarajat alýdyń basqa kózderin tapty.
«18 mln teńgeden úsh adamǵa beretin bolsa, ol 54 mln degen sóz. «Damý» banki ekinshi deńgeıli bankterdiń aldynda 85 paıyzyna garant bolatyn bolsa, qalǵan 15 paıyzyn olar óz qarajattary esebinen taýyp otyr», - dep atap ótti aýdandyq AShB basshysy Dúısenbek Ahmetov.
Osylaısha zaýyttyń úsh úleskeri qarjy tapsa, kelesi jyldyń kókteminde kásiporyn iske qosylmaq. Bul zaýyt bir aýysymda 10 tonna sút óndirip, 11 túrli ónim shyǵarýǵa qaýharly. Esh qaldyqsyz, tipti, eń sońynda kók sútten sýsabyn da jasaı alatyn tehnologııasy bar.