Qaraǵandy oblysynda sýper-polıtseı qyzmet etip jatyr

QARAǴANDY. QazAqparat – Qaraǵandyda ottan, sýdan jáne jol kólik oqıǵasynan ondaǵan adamdy qutqaryp qalǵan polıtseı turady. Ol erligin jumystan tys ýaqytta jasaǵan. Kúni keshe kók muzda taıǵanaqtap, aýdarylyp, tutana bastaǵan kólikten eki adamdy alyp shyqty, dep habarlaıdy QazAqparat tilshisi.

Medet Asqarov úıdegi 7 uldyń ortanshysy. Ákesinen jastaı aıyrylyp qalǵan. Eshkimniń ala jibin attamaý, qajet kezde qol ushyn sozýdy ana tárbıesinen boıǵa darytqan. Eń alǵash 2018 jyly 5 balany órtten aman alyp qalady.

«Bir áıel omyraýdaǵy balasymen dalaǵa shyǵyp qulap, kómek surady. Ol «balalarymdy qutqar, úıde órt bolyp jatyr, qara tútin alyp ketti» dedi. Úıine júgirip kirip, kimniń aıaǵyn ustadym, sony súıretip, úıge jetkize berdim. Jubaıymnan jedel járdem shaqyrýdy suradym», - deıdi Medet Asqarov.

Al bıyl jazda tártip saqshysy sýǵa batyp bara jatqan eki adamdy qutqarady.

«Áriptesim «eki áıel batyp jatyr» dep telefonmen habarlasty. Sodan men óz kóligimmen ózenge bardym. Sóıtsem áriptesim bir áıeldi qutqaryp jatyr eken. Biraq ekeýi de batyp barady. Aldymen jeńildeýin qolynan ustap alyp shyqtym da, keıin bar kúshimdi jınap, ekinshi Inga degen áıeldi qutqardym», - deıdi Buqar jyraý aýdandyq polıtsııa bóliminiń aǵa leıtenanty.

Sońǵy jaǵdaı kúni keshe bolypty. Tilegen esimdi aýyl turǵyny qas qaraıǵan shaqta jumystan úıine qaıtyp kele jatqanda, jaqynda ǵana alǵan sý jańa kóligi tasjolda aýdarylady. Eki balanyń ákesi esinen tanǵany nemese qatty shoshyǵany esinde joq, áıteýir esik ashýǵa qaýqary bolmaǵan. Abyroı bolǵanda aldynda Medet kele jatyp, baıqap qalady.

«Aýa raıy qolaısyzdyǵyna baılanysty azdaǵan boran, kóktaıǵaq boldy. Rýlge ıe bola almaı qaldym. Mashınany aýdaryp aldyq. Kóktaıǵaq, mashınany ári-beri laqtyra bastady, eki ret aınalyp tústik. Kóligimniń ishinde qaýipsizdik beldigin bosata almaı jatqan kezde Medet degen jigit keldi. Oǵan alǵysym sheksiz», - dedi Botaqara kentiniń turǵyny Tilegen Sákenov.

Medet Asqarovtyń úsh balasy bar. Іshki ister salasynda 16 jyldan beri qyzmet etip keledi. Sońǵy jasaǵan erligi úshin halyq áleýmettik jelilerde oǵan yqylasyn bildirgen. Al aýdandyq polıtsııa bólimi oblys departamentine Medetke qurmet kórsetip, marapattaý usynysyn jasaǵan. Biraq polıtsııa aǵa leıtenanty adam qutqarýdy adamgershilik boryshym dep sanaıdy.