Qaraǵandy oblysynda sý tasýy múmkin 149 eldimeken baqylaýǵa alyndy

QARAǴANDY. QazAqparat – 15 naýryzdan bastap Qaraǵandy oblysynda sý tasqynyna joǵary daıyndyq rejımi iske qosylady. Aımaqtyq sý tasqynyna qarsy shtab táýlik boıy jumys isteıdi. Búgingi tańda óńirdegi jaǵdaı turaqty, dep habarlaıdy QazAqparat tilshisi.

Óńirlik kommýnıkatsııalar qyzmetiniń platformasynda ótken brıfıngide sý tasqynyna qarsy is-sharalar týraly Qaraǵandy oblysy TJD bastyǵy Murat Qatpanov aıtyp berdi.

Oblystyń bas qutqarýshysynyń málimetinshe, 149 eldimeken, 99 jol ýchaskesi jáne 237 sý sharýashylyǵy qurylystary erekshe baqylaýǵa alyndy.

«Oblystyń barlyq óńirlerinde sý tasqynyna qarsy jedel shtabtar quryldy. 100 myń tonnadan astam ınertti materıal jáne 200 myńǵa jýyq qapshyqtar daıyndaldy. Eldi mekenderden 2 mln 192 myń m3 qar shyǵaryldy. 130 km sý burý transheıalary jasalyp, 167 km kanaldar men aryqtar tazartyldy. Avtojoldarda 4,5 myńnan astam sý ótkizgish qubyrlar men 461 kópir tazartyldy», - deıdi Murat Qatpanov.

Sý tasqynynyń erekshe qaýip tóndiretin ýaqyty 7-10 sáýir aralyǵyna keledi.

«13 naýryzdan bastap departamenttiń qutqarý bólimsheleri 2350 sharshy metr bolatyn ózenderdiń kúrdeli ýchaskelerinde muzdy kesý jáne burǵylaý jumystaryn bastady. Quramynda 3 myńǵa jýyq adam, 1388 birlik tehnıka, 66 júzý quraly, 360 birlik sý aıdaý tehnıkasy bar azamattyq qorǵaýdyń aýmaqtyq kishi júıesiniń kúshteri men quraldary daıyndyqqa keltirildi», - dep atap ótti Murat Qatpanov.

Sondaı-aq, TJD bastyǵy oblys turǵyndaryn aýlalardaǵy qardy tazalaýdy, sý ótkizý qurylystary men aryqtardy jeke aýmaqtaǵy qar men qoqystardan tazartýdy qamtamasyz etýge shaqyrdy. Bul erigen sýdy kedergisiz aǵyzýǵa múmkindik beredi.

Sý basý qaýpi tóngen jaǵdaıda halyqqa TJD kezekshi dıspetcherlik qyzmetine 43-36-36, 43-37-37 nemese 112 telefondary boıynsha habarlasýǵa keńes berildi.