Qaraǵandy oblysynda sý tasý qaýpi ǵaryshtan baqylanady

QARAǴANDY. QazAqparat - Qaraǵandy oblysynda qar erip, sý tasý jaǵdaıy ǵaryshtan baqylanady, dep habarlady, «QazAqparat» HAA tilshisi.

Ákimdik otyrysynda TJ departamentiniń basshysy Ibragım Kúlshimbaev mundaı tájirıbeniń alǵash ret engizilip otyrǵanyn aıtty.

«Ǵaryshtyq monıtorıngti qoldaný sý tasqyny jaǵdaıyn anaǵurlym tıimdi baqylaýǵa múmkindik beredi», - dedi Kúlshimbaev.

TJ mekemesi basshysynyń aıtýynsha, 2016 jyly Qaraǵandy oblysyndaǵy sý tasý jaǵdaıy óte kúrdeli boldy. Oblys aýmaǵyndaǵy barlyq ózen basseınderindegi qar qory óz normasynan 1,5-2 ese asyp, kúrdeli sý tasqyny jaǵdaıyna ákep soqty.

«Sonymen birge, sý tasqynyna daıyndyq boıynsha der kezinde uıymdastyrylǵan aýqymdy aldyn alý sharalary oń nátıjeler berdi. Kóp jyldyq baqylaýlar negizinde óńirdegi qalalar men aýdandardyń qaýiptiligi yqtımal sý nysandary jáne sý basý aımaqtary anyqtaldy jáne sýdyń tasýy kezinde erekshe nazar aýdaryldy. Sý basý qaýpi bar aýmaqtarǵa komıssııalyq tekserýler júrgizildi, eldi mekenderde turǵyndarǵa túsindirý jumystary júrgizilip, jınalystar men reıdtik sharalar uıymdastyryldy. Bıyl da dál osyndaı jumystar júrgiziledi», - dedi TJ departamentiniń basshysy.