Qaraǵandy oblysynda sý basý qaýpi bar 158 eldi meken erekshe baqylaýǵa alyndy

QARAǴANDY. QazAqparat – Qaraǵandy oblysynda bıylǵy qysta jaýyn-shashyn az boldy. Degenmen ótken aptada qar kóp jaýdy. Óńir basshysy Jeńis Qasymbek sý tasqynyna daıyndyqty erekshe baqylaýda ustaýdy tapsyrdy, dep habarlaıdy QazAqparat tilshisi.

Daıyndyq onlaın rejıminde apparattyq keńeste talqylandy.

«Sý tasqynyna qarsy is-sharalar jospary bekitildi, oǵan sáıkes jumystar júrgizilýde. Aımaqtyq shtab quryldy. Sý basý qaýpi bar 158 eldi meken erekshe baqylaýǵa alyndy. Halyqqa jadynamalar tarata otyryp, profılaktıkalyq reıdter bastadyq. Qalalar men aýdandarda materıaldyq-tehnıkalyq quraldardyń qory ulǵaıtylady. Kosmomonıtorıng júrgizýge shart jasaldy.

Ózenderdegi muzdy jarýǵa jarııalanǵan konkýrs tenderlik protsedýralar satysynda tur», – dedi oblystyq TJD bastyǵy Murat Qatpanov.

Onyń aıtýynsha, eldi mekenderden 523 myń tekshe metr qar shyǵaryldy. Bul jumys jalǵasýda. Naýryz aıynyń ortasyna deıin avtomobıl jáne temir joldardaǵy sý sharýashylyǵy qurylystarynyń, sý ótkizý qubyrlarynyń jaı-kúıin tekserý josparlanýda.

«Qazgıdromet» jáne TJD qyzmetkerleri ózen basseınderindegi qardyń deńgeıin ólsheıdi.

3–4 naýryzǵa «Kóktem-2022» respýblıkalyq oqý-jattyǵýy josparlanǵan, dep habarlady Murat Qatpanov. Vedomstvo basshysynyń málimetinshe, jeke quramnyń 9030 qyzmetkeri, avarııalyq-qutqarý jáne basqa da jumystarǵa arnalǵan 2 500-ge jýyq tehnıka daıyndyq rejıminde tur.

«Sońǵy aptada qar kóp jaýdy. Áli de jaýyn-shashyn bolady dep kútilýde. Qalalar

men aýdandardyń ákimderi qar shyǵarý jumystaryn jandandyrýy qajet. Tabıǵı

resýrstar jáne tabıǵat paıdalanýdy retteý basqarmasyna barlyq sý sharýashylyǵy qurylystaryn erekshe baqylaýda ustaýdy tapsyramyn», – dedi Jeńis Qasymbek.