Qaraǵandy oblysynda sý basý qaýpi bar 158 eldi meken baqylaýǵa alyndy
«Qazirgi ýaqytta oblysta sý tasqyny jaǵdaıy turaqty. Qazgıdromet málimetterine sáıkes, Nura, Sherýbaı-Nura, Sarysý, Keńgir, toqyraý ózenderi basseınindegi ylǵal qorynyń kólemi Qazgıdromettiń málimetteri boıynsha ortasha kópjyldyq mánnen 25-45% tómen.Topyraqtyń ylǵaldanýy Nura, Keńgir jáne Sarysý ózenderiniń basseınderinde normadan 13-62% tómen, Sherýbaı-Nura ózeni basseınindegi norma sheginde. Toqyraý ózeniniń basseıninde ortasha kópjyldyq mánnen 25% joǵary. Kóktemgi sý tasqynynyń aldyn ala kútiletin kólemi ótken jylǵy normalardan tómen», - dedi Murat Qatpanov.
Sý tasqynyna qarsy jumystar oblys ákimi bekitken is-sharalar josparyna sáıkes júrgiziledi. Sý basý qaýpi bar 158 eldi meken erekshe baqylaýǵa alyndy. Halyq úshin tótenshe jaǵdaı qaýpi jáne onyń týyndaýy kezindegi is-qımyldar boıynsha arnaıy usynymdar ázirlendi.
Eldi mekenderden 652 myń m3 jýyq qar shyǵaryldy. Bul jumystar jalǵasýda.
Sondaı-aq uzyndyǵy 8,9 km 7 kanal jáne uzyndyǵy 7,1 km 6 aryq tazartyldy, uzyndyǵy 5,1 km sý burǵysh transheıalarǵa kesý júrgizildi.
Sý tasqynymen baılanysty tótenshe jaǵdaılar saldaryn joıý úshin oblys aýmaǵynda 383 qurylym saqadaı daıyn. Olardyń quramynda 8 myńnan astam adam, 2400 birlikten astam tehnıka bar.
Jeke sektor turǵyndary óz aýmaqtarynda aldyn alý is-sharalaryn ýaqytyly ótkizýge shaqyryldy. Aryq júıesin der kezinde tazartý, qar shyǵarý jáne jeke turǵyn úı sektorynyń turǵyndary qabyldaıtyn basqa da aldyn alý sharalary mańyzdy bolyp tabylady jáne aýla aýmaqtary men qurylystaryn sý basýdan saqtaýǵa kómektesetini aıtyldy.