Qaraǵandy oblysynda Senatqa depýtattardy saılaý qaıda ótedi

QARAǴANDY. QazAqparat – Qaraǵandy oblysynda senator mandatyna 3 adam úmitker. Parlamenttiń joǵarǵy palatasyna saılaý 14 qańtarda Qaraǵandy kenshiler mádenıet saraıynyń ǵımaratynda ótedi. Daýys berýge saılaýshylar – oblystyń barlyq deńgeıdegi máslıhattarynyń depýtattary jınalady, dep habarlaıdy QazAqparat tilshisi.

Qaraǵandy óńiriniń ákimdiginde oblystyq saılaý komıssııasynyń bastamasymen Senat depýtattaryn saılaýdy uıymdastyrý boıynsha birlesken keńes ótti.

«Qaraǵandy oblysynda Senat depýtattyǵyna 7 kandıdat usynyldy. Úsh kandıdat tirkeldi: oblystyq máslıhat depýtaty, kommertsııalyq qurylymnyń qyzmetkeri jáne qoǵamdyq uıymnyń ókili», - dedi Qaraǵandy oblystyq saılaý komıssııasynyń tóraǵasy Qaırat Núrkenov.

Oblystyq saılaý komısssııasynyń aqparaty boıynsha kelesi úmitkerler tirkeldi:

- Qaraǵandy oblystyq máslıhatynyń hatshysy Serik Óteshov. Kandıdatýrasyn Nura jáne Osakarov aýdandarynyń máslıhattary usyndy;

- Qaraǵandy oblysy boıynsha jeke sot oryndaýshylarynyń óńirlik palatasynyń basshysy Murat Ábilov. Ózin-ózi usynǵan;

- Qaraǵandy oblysy Kásipodaq ortalyǵy tóraǵasynyń orynbasary Tatıana Shatohına. Ózin-ózi usynǵan.

Qazirgi ýaqytta úgit-nasıhat naýqany júrip jatyr, kandıdattar saılaýshy depýtattarmen kezdesedi. 13 qańtarda tynyshtyq kúni jarııalanady.

Kenshilerdiń mádenıet saraıynda barlyq qajetti jaǵdaılar qamtamasyz etiledi.

Oblys ákimi Ermaǵanbet Bólekpaev barlyq uıymdastyrý máselelerin tolyq sheshýdi tapsyrdy.

«Úzdiksiz ınternet baılanysyn, daýys berý ornyn materıaldyq-tehnıkalyq jaraqtandyrýdy jáne qoǵamdyq tártipti qamtamasyz etý qajet», - dep atap ótti óńir basshysy.

Esterińizge sala keteıik, Memleket basshysynyń Jarlyǵymen QR Parlamenti Senatynyń depýtattaryn saılaý 2023 jylǵy 14 qańtarǵa belgilendi.

Senatty qalyptastyrý tártibi QR Konstıtýtsııasynda aıqyndalǵan. Parlamenttiń joǵarǵy palatasynda ár oblystan, respýblıkalyq mańyzy bar qaladan jáne Astanadan eki adam usynylǵan. Senat depýtattary janama saılaý quqyǵy negizinde máslıhat depýtattarynyń jasyryn daýys berýimen saılanady. Senat depýtattarynyń ókilettik merzimi alty jyldy quraıdy. Bul rette, olardyń teń jartysy ár úsh jyl saıyn qaıta saılanady.