Qaraǵandy oblysynda segiz aılyq sábı óliminiń sebebi anyqtalyp jatyr

QARAǴANDY. QazAqparat – Qaraǵandy oblysynyń Qarqaraly aýdanynda 8 aılyq sábı kóz jumdy. Náresteniń ata-anasy balasynyń ólimine jergilikti dárigerlerdi kinálap otyr, dep habarlaıdy QazAqparat tilshisi.

17 qyrkúıekte Aıdarhanovtar otbasy Qarqaraly aýdandyq aýrýhanasynyń dárigerlerine júgingen. Balanyń qyzýy qatty kóterilip, ishi ótip, qusa bergen.

Dárigerler balany tekserip, ata-anasynan ony úıde birneshe kún baqylap otyrýdy suraǵan.

Alaıda, 19 qyrkúıekte náresteniń jaǵdaıy nasharlap, jedel járdemmen aýdandyq aýrýhanaǵa jetkizilgen.

«Bizge balaǵa bir-eki kún qarasańyzdar dedi. Dári-dármek taǵaıyndap, úıge jiberdi. Biraq kelesi kúni onyń jaǵdaıy nasharlady», - deıdi balanyń ákesi Berik Aıdarhanov,

Bala aýdandyq aýrýhananyń jansaqtaý bóliminde kóz jumdy. Sábıdiń denesin týystary Qaraǵandyǵa medıtsınalyq saraptamaǵa alyp keldi.

Berik Aıdarhanov dárigerlerdi nemquraıdylyq tanytty dep aıyptap otyr.

Bul oqıǵa QR DSM Medıtsınalyq jáne farmatsevtıkalyq baqylaý komıtetiniń Qaraǵandy oblysy boıynsha departamentinde tergelip jatyr.

«Qazirgi ýaqytta densaýlyq saqtaý basqarmasynyń buıryǵyna sáıkes oblystyq mamandar bala ólimine taldaý júrgizip jatyr. Taldaý nátıjesi boıynsha shara qabyldanady. Bul másele basqarma basshysynyń jeke baqylaýynda», - dep málimdedi densaýlyq saqtaý basqarmasy.