Qaraǵandy oblysynda saılaýǵa daıyndyq jumystary pysyqtaldy
Qazir Qaraǵandy oblysy boıynsha barlyǵy 654 saılaý ýchaskesi qurylǵan. Komıssııa músheleriniń sany 5 myń 500 den asady. Semınar-keńeske olardyń tóraǵalary qatysty. Kezdesý barysynda Májilis jáne máslıhat depýtattaryn saılaýǵa baılanysty daıyndyq jumystary pysyqtaldy. Onda aýmaqtyq saılaý komıssııasynyń atqarǵan jumystary ortaǵa salyndy.
«Bıylǵy saılaýdyń ereksheligi – partııalarǵa proportsıonaldy túrde, sodan keıin mojarıtarlyq túrde kandıtattarǵa daýys beriledi. Bıýletenderdiń ózi 5 bólikten turady. Ortalyq saılaý komıssııasynyń músheleri osyndaı oqý-ádistemelik maqsatynda óńir-óńirde semınar ótkizip jatyr. Bizde materıaldyq-tehnıkalyq qamtamasyz etilý jaıy sóz boldy. Sonymen qatar múmkindigi shekteýli jandardyń saıası naýqanǵa qatysýyna barynsha jaǵdaı jasalýda», - deıdi Qaraǵandy oblystyq saılaý komısssııasynyń tóraǵasy Qaırat Núrkenov.
Aldaǵy saıası naýqandy ashyq, ári barynsha ádil ótkizý úshin saılaý komıssııasynyń músheleri tájirıbe almasty. Komıssııa músheleriniń daıyndyǵyn pysyqtaý maqsatynda sabaqtar ótti. Qaraǵandyda ótken kóshpeli semınar-keńeste kásibı mamandar olarǵa saılaýdy qalaı durys uıymdastyrý kerektigin úıretip, zańnamaǵa engizilgen ózgeristerdi keńinen túsindirdi. Semınarǵa ortalyq saılaý komıssııasy tóraǵasynyń orynbasary Konstantın Petrov pen komıssııa múshesi Sábıla Mustafına qatysty.
«Bizde Qazaqstan boıynsha saılaý komıssııalarynyń 86440 múshesi bar. Búgingi bizdiń osy Qaraǵandy oblysyndaǵy ótkizip jatqan semınar kenesiniń eń mańyzdy suraǵy aldymyzdaǵy bolatyn saılaýdyń erekshelikteri. Praktıkalyq keńesterge baılanysty biz osy saılaý komıssııa múshelerimen sol saılaý kúnine qatysty máselelerdi talqylaımyz», - deıdi ortalyq saılaý komıssııasynyń múshesi Sábıla Mustafına.
Osy kúni oblys boıynsha 761 myń, 471 saılaýshy tirkelgen. Onyń ishinde 12 735-i 18 jasqa tolǵandar. Olar alǵash ret saılaýǵa qatyspaq.