Qaraǵandy oblysynda poıyz ben Land Cruiser soqtyǵysty
Oqıǵa 3 naýryz kúni saǵat 05:40 shamasynda Qaraǵandy - Sorokovaıa ýchaskesinde bolǵan. Aýmaq kúzetiledi jáne temirjol ótpesinde dabyl júıesi jumys istep turǵan.
«Land Cruiser avtokóligi poıyzben soqtyǵysty. Poıyzdyń mashınısti shuǵyl tejegishti basqanymen, tym jaqyn aralyqtan soqtyǵystyń aldyn alý múmkin bolmady. Zardap shekkender joq», - delingen habarlamada.
Aldyn ala málimetke sáıkes, avtokólik júrgizýshisi óreskel túrde jol erejesin buzyp, jaqyndap qalǵan poıyzdyń aldynda temir jolǵa shyǵyp ketken.
«Jyl basynan beri kólik júrgizýshileriniń keselinen temirjol ótkelderinde soqtyǵysýdyń úsh jaǵdaıy tirkeldi. 2018 jyly dál osyndaı 10 jaǵdaı oryn aldy. «QTJ - Júk tasymaly» AQ temir joldy kesip óterde avtokólik ıelerine abaı bolýǵa shaqyrady», - delingen habarlamada.