Qaraǵandy oblysynda polıtsııa borandy kúnde jolǵa shyqqan júrgizýshilerdi jazalamaq

ASTANA. QazAqparat - Qaraǵandylyq polıtseıler zańdy talapqa baǵynbaǵan júrgizýshilerdi jaýapqa tartpaq – dep habarlaıdy QazAqparat Polisia.kz saıtyna silteme jasap.

Saıttaǵy málimetterge qaraǵanda, 5 qańtar kúni aýa raıynyń qolaısyzdyǵyna baılanysty Almaty – Ekaterınbýrg tasjolynyń Qaraǵandy jáne Balqash qalalarynyń ýchaskesi basqa da respýblıkalyq mańyzy bar tasjoldar sııaqty jabylǵan bolatyn.

Azamattardyń qaýipsizdigin saqtaý maqsatynda Balqash qalasynan shyǵa beris jolǵa qalalyq polıtsııa bólimi qyzmetkerlerinen blokpost qoıyldy.

Polıtsııa qyzmetkerleri qoǵan shekteýlerge qaramastan, úsh júrgizýshi polıtsııanyń zańdy talaptaryna baǵynbaı Qaraǵandy qalasyna qaraı jolǵa shyǵyp ketken.

Sol kúni saǵat 20:00 shamasynda polıtsııa qyzmetkerleri Qaraǵandy qalasynda 41 jastaǵy elorda turǵynynyń basqarýyndaǵy Hyundai Creta avtokóligin toqtatty. Kólik tizgininde otyrǵan áıelge qatysty Qazaqstan Respýblıkasy Ákimshilik quqyq buzýshylyq kodeksiniń 667-babyna sáıkes hattama toltyryldy.

7 qańtar kúni oblystyq Polıtsııa departamenti Jergilikti polıtsııa qyzmeti basqarmasynyń izdestirý bólimi qyzmetkerleri Túrkistan qalasynyń 37 jastaǵy turǵynynyń basqarýyndaǵy Toyota Prado jáne Astana qalasynyń 32 jastaǵy turǵynynyń basqarýyndaǵy Lada-21144 kóligin anyqtady.

Quqyq buzýshylarǵa Qazaqstan Respýblıkasy Ákimshilik quqyq buzýshylyq kodeksiniń 667-baby «Quqyq qorǵaý organy qyzmetkerleriniń zańdy talaptaryna baǵynbaý» boıynsha hattama toltyryldy. Bul baptyń sanktsııasyna sáıkes quqyq buzýshylarǵa aıyppul nemese 15 táýlikke qamaýǵa alý ákimshilik jazasy kózdelgen. Jınaqtalǵan materıaldar júrgizýshilerdiń turǵylyqty jerleri boıynsha sheshim qabyldaý úshin sotqa jiberildi.

Qaraǵandy oblysy Polıtsııa departamenti júrgizýshilerden aýa raıy boljamdaryna nazar aýdaryp, jol jabylǵan jaǵdaıda jolǵa shyqpaýdy, sondaı-aq polıtsııanyń zańdy talaptaryn oryndaý kerektigin eskertedi.