Qaraǵandy oblysynda ózin jumyspen qamtyǵan 4 myń turǵyn medsaqtandyrý júıesine jarna aýdardy

QARAǴANDY. QazAqparat - Qaraǵandy oblysynyń 4 myńnan astam turǵyny BJT (biryńǵaı jıyntyq tólem) tóledi. Áleýmettik medıtsınalyq saqtandyrý júıesine qatysýdyń mundaı túrin repetıtorlar, kútýshiler, jeke qosalqy sharýashylyqtardyń ıeleri jáne basqa da óz betinshe jumyspen aınalysýshylar tańdady, dep habarlaıdy QazAqparat tilshisi.

Atalmysh sanattaǵy azamattar aı saıyn 2651 teńge (qala turǵyndary úshin 1 AEK) jáne 1326 teńgeden (aýyl turǵyndary úshin 0,5 AEK) tóleıdi. BJT turaqty tólegen kezde olardyń barlyǵy tegin medıtsınalyq kómektiń kepildik berilgen kólemine ǵana emes, sondaı-aq konsýltatsııalyq-dıagnostıkalyq qyzmetter men joǵary tehnologııalyq operatsııalardy qarastyratyn MÁMS paketine de tegin qol jetkize alady.

KІMDER BJT TÓLEÝShІ BOLA ALADY:

• Jeke tulǵalarǵa qyzmet kórsetetin;

• jeke qosalqy sharýashylyqtan ónim satatyn;

• óz óndirisiniń ónimderin satatyn adamdar.

Sonymen birge:

• jeke kásipker retinde tirkelmegender;

• jaldamaly qyzmetkerlerdiń eńbegin paıdalanbaıtyndar.

BJT TÓLEÝShІLER BOLYP TANYLMAITYNDAR:

• saýda ortalyqtarynyń, dúkenderdiń aýmaǵynda kommertsııalyq qyzmetti júzege asyratyn;

• bólimderdi jalǵa alatyn;

• múlikti jalǵa beretin (turǵyn emes),

• jeke praktıkamen aınalysatyn tulǵalar (notarıýstar, advokattar, sot oryndaýshylary, kásibı medıatorlar;

• oralmandardy qospaǵanda, sheteldikter jáne azamattyǵy joq adamdar;

• tirkelgen jeke kásipkerler.

BІRYŃǴAI JIYNTYQ TÓLEM QALAI BÓLІNEDІ

• Zeınetaqy aýdarymyna 30%.

• 40% - medıtsınalyq saqtandyrý qoryna.

• 20% - áleýmettik saqtandyrý.

• 10% - jeke tabys salyǵy.

BJT QALAI TÓLEÝGE BOLADY:

• bankter

• «Qazposhta» AQ kassalary

• Kaspi.kz mobıldi qosymshasy arqyly

«Saqtandyrylǵan» mártebesi tólemderdi úsh aı turaqty tólep otyrǵan soń paıda bolady. Qazir 2020 jyldyń 31 naýryzyna deıin eldiń barlyq turǵyndary «shartty túrde saqtandyrylǵan», keıin ol mártebe tólemderdiń turaqtylyǵyna baılanysty bolady. Bul rette ótip ketken kezeń úshin BJT tóleýge bolmaıtynyn atap ótý kerek. Eger qandaı da bir sebepterge baılanysty azamat 1 aı tólemdi jiberip alsa, onda ol áleýmettik medıtsınalyq saqtandyrý qoryna BTJ-nyń 5%-yn derbes tóleýshi retinde tóleı alady, qazir bul 2125 teńge. Sol kezde mártebesi saqtalady. Odan ári de mártebeden basqa zeınetaqy ótili, tabys salyǵy, áleýmettik saqtandyrý júrgizý úshin BJT tóleýdi jalǵastyrýǵa bolady», - dedi Medıtsınalyq saqtandyrý Qory Qaraǵandy fılıalynyń bólim basshysy Svetlana Şetkına.