Qaraǵandy oblysynda «Nurly jol» baǵdarlamasy aıasynda qandaı jumystar atqaryldy
Ekonomıka basqarmasy basshysynyń mindetin atqarýshy Gúlmıra Ábishevanyń aıtýynsha, 2015 jyly baǵdarlama bastalǵan sátten bastap Qaraǵandy oblysynda jalpy somasy 30.6 mlrd teńgege 61 joba júzege asyrylǵan. Bul aqsha kólik, turǵyn úı-kommýnaldyq ınfraqurylymdy, bilim berý ınfraqurylymyn damytýǵa jáne agroónerkásiptik keshendi damytýǵa jumsaldy. - Tórt kópir qaıta jańartylyp, 350 shaqyrym oblystyq mańyzy bar avtomobıl joldaryna ortasha jóndeý júrgizildi. 17,6 km jylý jelileri, 4,3 shaqyrym sý qubyry jáne 15,1 shaqyrym sý burý jelileri qaıta jańartyldy. Aqtasta qýaty 11,2 Gkal/saǵ modýldik qazandyq salyndy. Turǵyn úı nysandaryn salý úshin Qaraǵandy, Jezqazǵan, Prıozersk, Abaı, Jańaarqa, Qarqaraly aýdandaryndaǵy 10 úıge jáne Abaı aýdanyndaǵy 32 jer ýchaskesine ınjenerlik-kommýnıkatsııalyq ınfraqurylym salyndy, - dedi Gúlmıra Ábisheva. Baǵdarlama aıasynda 14,5 myń sharshy metr turǵyn úı, 320 oryndyq balabaqsha, Qaraǵandy qalasynda kórý qabileti buzylǵan balalarǵa arnalǵan 250 oryndyq mektep-ınternat, Sátbaev qalasynda 600 oryndyq jáne Qaraǵandyda 1200 oryndyq mektep paıdalanýǵa berildi. Bul Sátbaev qalasynda jáne ishinara oblys ortalyǵynda úsh aýysymda oqý máselesin sheshýge kómektesti. Qazir óńirde taǵy úsh mektep – Qaraǵandydaǵy Panel Ortalyq shaǵynaýdanynda 1200 oryndyq, Temirtaý qalasynda 600 oryndyq jáne Aqtoǵaı aýdanynyń Saryshaǵan aýylynda 464 oryndyq mektep salynýda. Jalpy, baǵdarlamanyń arqasynda oblysta 466 turaqty jáne 799 ýaqytsha jumys orny ashyldy. Jaqsy jáne qanaǵattanarlyq jaǵdaıdaǵy joldardyń sanyn 74%-dan 76%-ǵa deıin arttyrý, jylý jáne sý qubyry jelileriniń tozýyn tómendetý, turaqty avtobýs marshrýttarynyń, onyń ishinde kenttik jáne aýdanishilik baǵdarlardyń sanyn kóbeıtýge múmkindik týdy. 2019 jyly memlekettik baǵdarlamalar aıasynda 266,4 shaqyrym sý qubyry jáne káriz jelilerin salý jáne qaıta jańartý, sondaı-aq 5,3 shaqyrym jylý jelilerin jańǵyrtý josparlanýda. Qaraǵandy oblysynyń ákimi Jeńis Qasymbek basqarma basshylaryna 2020 jyldan 2025 jylǵa deıin «Nurly jol» baǵdarlamasynyń ekinshi besjyldyǵynda jańa jobalardy iske asyrýǵa respýblıkalyq bıýdjetten qarjy alý úshin barlyq qajetti qujattardy daıyndaýdy tapsyrdy.