Qaraǵandy oblysynda Naýryz meıramy qalaı toılanady
Naýryz meıramy qalaı toılanatynyn Qaraǵandy oblystyq mádenıet, arhıvter jáne qujattama basqarmasynyń basshysy Erkebulan Jumakenov aıtyp berdi.
Naýryz merekesiniń basty ıdeıasy – Qazaqstan jerinde beıbitshilik pen dostyqty nyǵaıtý, ulttyq biregeılikti saqtaý, otbasylyq qundylyqtardy dáripteý, qorshaǵan ortaǵa uqypty qaraýdy qalyptastyrý.
Ár kún jeke taqyrypqa arnalǵan:
14 naýryz – Kórisý kúni;
15 naýryz – Aýla kúni;
16 naýryz – Shejire kúni;
17 naýryz – Tarıhqa taǵzym kúni;
18 naýryz – Igi ister kúni;
19 naýryz – Shymyrlyq pen sheberlik kúni;
20 naýryz – Zııatkerlik kún;
21 naýryz – Ulttyq taǵamdar kúni;
22 naýryz – Ulystyń uly kúni;
23 naýryz – Joralǵy kúni.
«Oblystyń qalalary men aýdandarynda negizgi merekelik sharalar 21-22 naýryzda ótedi. Etnoaýyl ornatylyp, teatrlandyrylǵan qoıylymdar, kontsertter, sport jarystary ótedi. Oblys boıynsha 302 kıiz úı tigiledi», – dedi Erkebulan Jumakenov.
Qaraǵandyda basty mereke 22 naýryzda ótedi.
Qala boıynsha 31 kıiz úı bolady: Ortalyq mádenıet jáne demalys saıabaǵynda, Dostyq úıiniń, Jańa Maıqudyq mádenıet úıiniń, Temirjolshylar men Jastar mádenıet úıiniń janynda.
Ortalyq saıabaqtyń jaǵalaýynda saǵat 12:00-de teatrlandyrylǵan qoıylym bastalyp, kontsertke ulasady.
Ulttyq sport túrlerin súıetinder úshin jarystar uıymdastyrylady. Jergilikti qolónershiler arnaıy kórmede óz ónimderin usynady.
Sol kúni Kenshiler mádenıet saraıynda Buqar jyraý Qalqamanulynyń 355 jyldyǵyna arnalǵan «Armystyń áz Naýryz!» atty respýblıkalyq aıtys ótedi.
On kún ishinde qalalar men aýdandarda birqatar is-sharalar ótedi. Shet aýdanynda «Bizdiń kóshe turǵyndary» tatý kórshiler baıqaýy uıymdastyrylady.
Abaı aýdanynda kontsertte etnomádenı birlestikter óz qoıylymdaryn usynady.
Saran qalasynda «Altyn mura» horeografııalyq óner festıvali, Prıozersk qalasynda quraq quraý baıqaýy, Qarqaraly qalasynda jerles satırık Martbek Toqmyrzanyń 55 jyldyǵyna arnalǵan ázil-syqaq baıqaýy ótedi.
Kitaphanalarda eńbek áýletterimen kezdesý uıymdastyrylady.
Barlyq qalalar men aýdandarda qaıyrymdylyq aktsııasy ótedi.