Qaraǵandy oblysynda medıtsınalyq ońaltýdy qarjylandyrý úsh esege artty

QARAǴANDY. QazAqparat – Qaraǵandy oblysynda 2020 jyly medıtsınalyq ońaltýdy qarjylandyrý 3 esege artty. Medıtsınalyq saqtandyrý qory Qaraǵandy fılıalynyń dırektory Fazyl Qopabaev tikeleı efırde ótken brıfıngide MÁMS júıesin engizýdiń 2020 jylǵy qorytyndysy týraly aıtyp berdi, dep habarlady QazAqparat tilshisi.

2020 jylǵa qor medıtsınalyq qyzmetterdi satyp alýdy elektrondyq formatta júrgizdi, bul jetkizýshilerdiń qor qyzmetkerlerimen jáne komıssııa múshelerimen tikeleı baılanyspaıdy. Qordyń fılıaly 2020 jyly óńirdegi 103 medıtsınalyq kómek berýshimen medıtsınalyq qyzmetterdi satyp alý boıynsha 292 shart jasasty. Onyń ishinde: ambýlatorııalyq-emhanalyq kómek boıynsha - 116 shart, statsıonarlyq kómek – 170 shart jáne áleýmettik máni bar aýrýlar kezinde kómek kórsetýge – 4 shart.

Búgingi tańda óńirdiń bıýdjeti 119,5 mlrd teńge, onyń ishinde TMKKK - 87,1 mlrd teńge, MÁMS júıesinde - 32,4 mlrd teńge. 2019 jylmen salystyrǵanda ósim 33,8%-ǵa ósti.

Pandemııa jaǵdaıynda jáne COVID-19 taralýyna jol bermeý maqsatynda óńirde medıtsınalyq qyzmetterge aqy tóleýge 19,6 mlrd teńge bólindi. Onyń ishinde: PTR júrgizý jáne KVI bar naýqastardy emdeý shyǵynyn óteýge - 6,7 mlrd teńge, medıtsına qyzmetkerlerine yntalandyrý ústemeaqysy - 12,9 mlrd teńge.

«Bıyl alǵash ret MÁMS qarajaty esebinen mektep medıtsınasyn jeke qarjylandyrý qarastyrylǵan, konsýltatsııalyq-dıagnostıkalyq kómekti qarjylandyrý kólemi aıtarlyqtaı keńeıtilgen (12,3 mlrd teńgege deıin), bul ótken jylmen salystyrǵanda 3,8 ese kóp. Sondaı-aq, MÁMS engizilgennen keıin medıtsınalyq ońaltýdy qarjylandyrý kólemi 3 esege (3,7 mlrd teńge); statsıonardy almastyratyn kómek kólemi 1,6 esege (5 mlrd teńge) artty», - dep tolyqtyrdy Fazyl Qopabaev.