Qaraǵandy oblysynda qysqy UBT 25 qańtarda bastalady

QARAǴANDY. QazAqparat – Qaraǵandy oblysynda Ulttyq biryńǵaı testileýdiń qysqy kezeńin 25 qańtar men 22 aqpan aralyǵynda ótkizý josparlanǵan. Testileý barlyq sanıtarlyq-epıdemıologııalyq sharalardy saqtaı otyryp, úsh pýnktide uıymdastyrylady, dep habarlaıdy QazAqparat tilshisi.

UBT ótkizý pýnktileri ornalasqan jerler: Qaraǵandy qalasy, Qazaqstan k-si, 15a; Balqash qalasy, Qazbekov k-si, 12 (Balqash kópsalaly kolledji); Jezqazǵan qalasy, Baıqońyrov k-si, 123.

«Ulttyq biryńǵaı testileý – joǵary jáne (nemese) joǵary oqý ornynan keıingi bilim berý uıymdaryna túsýge arnalǵan irikteý emtıhandarynyń bir nysany. 2021 jyldan bastap UBT «bir kompıýter – bir kamera – bir testilenýshi» qaǵıdaty boıynsha elektrondyq formatta ótkiziledi», – dep atap ótti Ulttyq testileý ortalyǵy Qaraǵandy fılıalynyń basshysy Dınara Baımaǵambetova.

Testileýge bes myńǵa jýyq adam qatysady dep kútilýde. Tirkelý kezinde túlekter UBT tapsyrý kúnin, ýaqytyn jáne ornyn ózderi tańdaıdy.

«Testileý kezinde UBT ótkizý pýnktiniń aýmaǵynda ata-analardyń, muǵalimderdiń jáne basqa da adamdardyń bolýyna jol berilmeıdi. Aýdıtorııalarǵa test tapsyrýshylardy qashyqtyqty saqtaı otyryp, barrıkadalyq taspalar arqyly kezek-kezekpen ótkizedi. Túlekter bir-birinen keminde bir metr qashyqtyqta otyrǵyzylady. Árbir testilenýshiniń organıkalyq shynymen qorshalǵan óz orny bar», – dedi Dınara Baımaǵambetova.

Koronovırýs ınfektsııasynyń taralý qaýpin azaıtý úshin testileý pýnktilerinde túlekter betperde kııý kerek. Termometrııa da júzege asyrylady. Barlyq pýnktiler sanıtaızerlermen, shekteý lentalarymen, dezınfektsııalaý kilemshelerimen jabdyqtalǵan. Árbir aýdıtorııada paıdalanylǵan maskalarǵa arnalǵan ýrnalar, retsırkýlıatorlar jáne bakterıtsıdti shamdar ornatylǵan.

Bilim berý grantyn berý jónindegi konkýrsqa qatysý úshin nemese aqyly negizde oqýǵa qabyldaný úshin mynadaı shekti baldar belgilengen:

- «Pedagogıkalyq ǵylymdar» – keminde 75 ball;

- «Densaýlyq saqtaý jáne áleýmettik qamtamasyz etý (medıtsına)» – keminde 65 ball;

- «Aýyl sharýashylyǵy jáne bıoresýrstar», «Veterınarııa» – keminde 60 ball;

– Ulttyq joǵary oqý oryndaryna túsý úshin – keminde 65 ball, basqa joǵary oqý oryndaryna túsý úshin – keminde 50 ball.

Bul rette testilenýshi árbir pán boıynsha keminde 5 ball jınaýy tıis. Jalpy, túlekterge 120 suraq beriledi. Olardyń durys jaýaptary 140 ball bop esepteledi. ıAǵnı, mamandandyrylǵan pánderde keıbir suraqtar 0-den 2 balǵa deıin, al qalǵan suraqtar 1 balmen baǵalanady.