Qaraǵandy oblysynda KVI naýqastaryna arnalǵan 5 myńnan astam tósek-oryn bar
Óńirlik kommýnıkatsııalar qyzmetinde ótken onlaın-brıfıng barysynda densaýlyq saqtaý basqarmasynyń basshysy Gamal Toqsambaev qazirgi epıdemıologııalyq jaǵdaı týraly aıtyp berdi.
Búgingi kúni KVI dertine shaldyqqan naýqastarǵa arnalǵan 5 147 tósektiń 2 650-i bos emes. Reanımatsııada 130 patsıent bar, ókpeni jasandy jeldetý apparatyna 30 adam qosylǵan.
«Eń kóp aýrý tirkelgen óńirlerde rezervtik tósekterdi iske qosýdy jalǵastyryp jatyrmyz. Qaraǵandyda 280 tósek-oryn ashyldy. Jalpy sany 1 760-qa deıin jetkizildi. Júkteme - 58,5%. Sondaı-aq, óńirde alǵashqy medıtsınalyq-sanıtarlyq kómek kórsetetin uıymdardyń jumysy kúsheıtildi, onda sımptomsyz jáne jeńil túri bar patsıentterge úıde mýltıdıstsıplınarlyq brıgadalar qyzmet kórsetedi», - dep habarlady Gamal Toqsambaev.
Búgingi tańda óńirde medıtsınalyq uıymdardyń materıaldyq-tehnıkalyq bazasy nyǵaıtyldy.
26 kompıýterlik tomograf bar, onyń ishinde 22 KVI bar patsıentterde ókpe júıesiniń zaqymdanýyn dıagnostıkalaýǵa qatysady.
«Bizde 40 tsıfrlyq rentgen-qondyrǵy, 364 ÓJJ apparaty bar. 25 aýrýhanada medıtsınalyq gaz taratýdyń ortalyqtandyrylǵan júıesi bar. Táýligine 15,6 myń synamalyq qýaty bar 10 PTR-zerthananyń jumysy qamtamasyz etildi. Qorda 140 myń test bar», - dep tolyqtyrdy oblystyń bas dárigeri.
Patsıentterge úıde qyzmet kórsetý úshin sanıtarlyq avtokólikpen qamtamasyz etilgen 329 emhanalyq mobıldi brıgada jumys isteıdi.
Jedel medıtsınalyq kómekti 105 brıgada kórsetedi. Epıdemıologııalyq jaǵdaı nasharlaǵan jaǵdaıda marshrýtqa taǵy 20 qosymsha brıgada shyǵarylatyn bolady.
Medıtsınalyq uıymdarda dári-dármekter men jeke qorǵaný quraldarynyń úsh aılyq qory bar, dep atap ótti spıker.
Qaraǵandy oblysynda KVI aýrýynyń 55 864 jaǵdaıy tirkeldi, 45 445 adam saýyǵyp ketti.