Qaraǵandy oblysynda Qurban aıt merekesi qalaı ótedi

QARAǴANDY. QazAqparat – 20–22 shildede musylmandardyń basty merekeleriniń biri – Qurban aıt atap ótiledi. Qurbandyq shalý rásimi qalaı ótetinin brıfıngte Qaraǵandy oblysynyń bas ımamy Ómirzaq Bekqoja aıtyp berdi, dep habarlaıdy QazAqparat tilshisi.

«Bıyl qurbandyqtar qurban2021.kz saıty arqyly onlaın jasalady. Saıt iske qosylǵan. 17 shildede tapsyrystardy qabyldaý bastalady. Sondaı-aq aıt namazy oqylmaıdy. Ótken jyly da solaı boldy», – dep atap ótti Ómirzaq Bekqoja.

Qurbandyq shalǵysy keletinderdiń bári saıtta óz aımaǵyn tańdaıdy, sodan keıin maldyń qunyn qosymsha arqyly tóleıdi.

Óńirlerde WhatsApp nómirleri jumys isteıdi, onda tapsyrys berýshiler etti kimge bergisi keletinin kórsetedi.

Barlyq qurbandyq eti muqtaj adamdarǵa beriledi. Tapsyrys berýshilerge olardyń qalaýy boıynsha beıne jáne fotoesep usynylady.

Sondaı-aq qurbandyq shalýdy oflaın jasaý múmkindigi bar. Ol úshin oblystyń qalalary men aýdandarynda arnaıy oryndar bekitildi.

Qaraǵandyda mal soıatyn úsh pýnkt bar:

- «Araı.kz», Gogol k-si, 2/23;

- JK «Abıshev», Reznık k-si, 18;

- «Hasenov» ShQ, S. Seıfýllın k-si, 53.

«Munda sanıtarlyq normalar saqtalady jáne veterınarlyq qyzmettiń ruqsaty bar. Biraq bul jerlerde adamdar kóp jınalýǵa jol berilmeıdi. Qalada mal satýǵa tek arnaıy jabdyqtalǵan «Araı.kz» alańynda ǵana ruqsat etilgen. Aýlalarda nemese kólikterde satýǵa tyıym salynady. Fermerlerdi osyny eskerýge shaqyramyz. Sondaı-aq, biz fermerlermen kelisimge qol qoıdyq, oǵan sáıkes olar qoıdyń qunyn belgili bir baǵadan asyrmaýy kerek. Oblysta Qurban aıtqa kelesi baǵa bekitildi: qoı – 75 myń teńge, eshki – 55 myń teńge jáne iri qara – 420 myń teńge», – deıdi spıker.

Ómirzaq Bekqojanyń aıtýynsha, meshitke Qurban aıt merekesine kómek alýǵa ótinishter kelip túsýde.

Muqtajdar tizimi jasalǵannan keıin eriktiler mereke kúnderi et pen azyq-túlik jıyntyqtaryn tasymaldaıdy.

Ótken jyly osyndaı kómekti 3 689 muqtaj otbasy aldy.

Sondaı-aq, muqtaj adamdarǵa qurban2021.kz saıty arqyly qurbandyq etine ótinish berý múmkindigi bar.

Qurban aıt merekesi jáne qurbandyq shalý týraly qosymsha aqparatty oblys turǵyndary (8-7212) 77-17-47 jáne 8-702-403-99-50 (WhatsApp) nómirinen ala alady.