Qaraǵandy oblysynda «kýrerler» turǵyndar atynan nesıe alǵan
Shahtınsk qalasynyń polıtseıleri qarapaıym azamattardyń atyna nesıe rásimdegen alaıaqtar tobyn ustady. Shema boıynsha úsh er adam ózderin joldama jetkizý qyzmetiniń kýreri retinde tanystyryp, adamdarǵa tapsyrys boıynsha hat kelgenin habarlaǵan. Alaıda ol hatty alý úshin jeke kýálikti kórsetýdi jáne ony sýretke túsirý kerektigin aıtqan. Keıin anyqtalǵandaı, olar adamdardyń telefonyna bank qosymshasyn ornatyp, nesıe rásimdegen. Alǵan aqshany óz shottaryna aýdaryp otyrǵan.
Osy shema qurbandarynyń biri 2 tamyzda Qaraǵandy oblysy Shahtınsk qalasynyń polıtsııa bólimine júgingen. 60 jastaǵy áıel belgisiz bireýler onyń atyna 750 myń teńge nesıe rásimdegenin habarlady.
«Belgili bolǵandaı, jábirlenýshi saıajaı qoǵamdarynyń birinde kúzetshi bolyp jumys isteıdi. 14 shilde kúni saǵat 14.00-de baqylaý-ótkizý pýnktine ózderin kýrermiz dep tanystyrǵan úsh adam kelgen. Olar áıeldiń atyna hat keldi dep málimdegen. Biraq ony alý úshin resmı protsedýrany oryndaý kerektigin aıtqan. Kýrerler jábirlenýshiniń uıaly telefonyn surap, áıeldi sýretke túsirip, uıaly telefondy qaıtaryp bergen. Jábirlenýshi bul rette belgisiz bireýler onyń telefonyna bankterdiń biriniń mobıldik qosymshasyn ornatyp, ol arqyly 750 myń teńgege nesıe resimdegenin bilmeı qalǵan. Bul týraly áıel qarjy mekemesinen tıisti jarna engizý qajettigi týraly SMS-habarlama kelgen kezde ǵana bilgen», - delingen Qaraǵandy oblysy Polıtsııa departamentiniń málimetinde.
Keıin osy «kýrerler» Shahtınsk qalasynyń mańyndaǵy kentterdiń birinde turatyn er adamdy aldaǵan. Týra sol shema boıynsha áreket etken top, jábirlenýshige tapsyrys hatyn berý syltaýymen ony sýretke túsirip, bank qosymshasyn ornatyp, 6 mln teńgege nesıe rásimdegen.
«9 qyrkúıekte jedel-izdestirý sharalary barysynda krımınaldyq polıtsııa qyzmetkerleri kúdiktilerdi – 23, 25 jáne 35 jastaǵy úsh er adamdy anyqtady. Olar óz kinásin moıyndady. Polıtseıler kúdiktilerdiń osyndaı 8 qylmysqa qatysy baryn dáleldedi», - dedi vedomstvodan.
Qazirgi ýaqytta QR Qylmystyq kodeksiniń 190-baby «Alaıaqtyq» boıynsha sotqa deıingi tergeý júrgizilip jatyr. Kúdiktiler ýaqytsha ustaý ızolıatoryna qamaldy.