Qaraǵandy oblysynda koronavırýsqa shaldyǵý kórsetkishi 21% azaıdy

NUR-SULTAN. QazAqparat – Qaraǵandy oblysynda sońǵy apta ishinde óńir turǵyndarynyń koronavırýsqa shaldyǵýy 21 paıyzǵa azaıdy. Bul týraly Qaraǵandy oblysy ákiminiń orynbasary Ermek Alpysov aıtty, dep habarlaıdy QazAqparat tilshisi.

«Jyl basynan beri Qaraǵandy oblysynda koronovırýsty juqtyrýdyń 98 898 jaǵdaıy tirkeldi. Qazirgi kezde onyń ishinde 90 100 adam jazyldy. Oblysymyz búginnen bastap «sary» aımaqqa kirdi. Biraq, negizgi shekteý is-sharalary saqtalady. Sonymen qatar qazir epıdemıologııalyq jaǵdaı turaqty jáne juqtyrý jaǵdaılarynyń sany azaıyp keledi. Sońǵy aptada ınfektsııanyń jańa jaǵdaılary 21 paıyzǵa azaıdy. Pandemııa densaýlyq saqtaý júıesin damytý josparyna, onyń ishinde qarjylandyrý aǵynyn bólýge túzetý engizdi. Biz negizgi kúsh-quraldardy ártúrli aýyrlyqtaǵy koronavırýs ınfektsııasy bar naýqastardy dıagnostıkalaý men emdeýge arnalǵan ınfraqurylymdy damytýǵa baǵyttadyq», - dedi ol ortalyq kommýnıkatsııalar qyzmetindegi baspasóz máslıhatynda.

Spıkerdiń atap ótýinshe, Qaraǵandy oblysynda «Ashyq» jobasy sátti júzege asyp jatyr.

«Jobaǵa 12 myńnan astam kásipker qatysýda. Bul - respýblıka boıynsha úshinshi kórsetkish sanalady», - dedi Ermek Alpysov.