Qaraǵandy oblysynda kópbalaly otbasylarǵa turǵyn úı sertıfıkaty beriledi

QARAǴANDY. QazAqparat - Qaraǵandy oblysynda kópbalaly ata-analarǵa baspana alý úshin turǵyn úı sertıfıkattary men qolaıly nesıeler beriletin bolady. Bul týraly oblys ákimi Erlan Qoshanov esep berý kezdesýinde aıtty, dep habarlaıdy QazAqparat.

«Bul taqyryp óte ózekti. Búginde oblysta turǵyn úı alý úshin 1 206 kópbalaly otbasy kezekte tur. Ózderińiz biletindeı, «Nurly jer» baǵdarlamasy boıynsha biz kezekte turǵandardyń barlyq 11 sanaty úshin jylyna 300-ge jýyq páter salýdamyz. Osy sanattar boıynsha kezekte turǵandardyń sany búgingi tańda 36 myńnan asady. Mundaı qarqynmen biz, árıne, jaqyn arada baspanaǵa muqtajdardy pátermen qamtamasyz ete almaımyz», - dep atap ótti Erlan Qoshanov.

Oblys ákimi osyǵan baılanysty qabyldanǵan sheshimder týraly aıtyp ótti.

Birinshiden, kezekte turǵan kóp balaly otbasylardy nesıelendirý úshin «Turǵynúıqurylysjınaqbankine» oblystyq bıýdjetten 1 mlrd teńge bólinedi.

«Jyldyq mólsherlemesi 2% quraıtyn 15 mln teńgege deıin nesıe qarastyrylǵan. Bastapqy jarna - 10%. Sonymen qatar, kiristerge qoıylatyn talaptar belgilenedi: otbasynyń bir múshesine shaqqanda eń tómengi kúnkóris deńgeıi bir jarymnan aspaýy tıis, ol degenimiz - 44 547 teńge», - dep túsindirdi Erlan Qoshanov.

Ekinshiden, oblystyq bıýdjette osy jyly bastapqy jarnany sýbsıdııalaý úshin turǵyn úı sertıfıkattaryna 1 mlrd teńge qarastyrylǵan. Kópbalaly otbasylar da osy qoldaýdy paıdalana alady. Mysaly, páter quny 10 mln teńge bolsa, turǵyn úı sertıfıkaty 1 mln teńgeni quraıtyn bastapqy jarnany tolyǵymen jabady. Aldyn ala esep boıynsha, aı saıynǵy tólem ortasha eseptegende 41 myń teńgeni quraıdy.