Qaraǵandy oblysynda kóktemgi egis naýqany qyzý júrip jatyr
Serik Shaıdarov Osakarov aýdanyndaǵy «Sadovoe-K» JShS men «Áýbákirov» jáne «Saltanat» sharýa qojalyqtarynyń alqaptarynda boldy. Munda sharýalar qajetti tuqym alyp, tehnıkasyn daıyndap jumys jospar boıynsha júrip jatyr.
Oblys ákiminiń orynbasary «Saltanat» sharýa qojalyǵynda salynyp jatqan 600 basqa arnalǵan taýarly-sút fermasy men «Sadovoe-K» JShS bazasyndaǵy fermany aralap qaıtty.
Nura aýdanynda oblys ákiminiń orynbasary «Karoı» JShS-de bolyp, Zarechnyı aýylynda «Aq marjan», «Akýpov», «Bereke» jáne basqa sharýa qojalyqtarynyń basshylarymen kezdesti.
«Karoı» JShS basshysy Vıktor Prıb sútti mal sharýashylyǵyn damytý josparlary týraly aıtyp berdi.
Serik Shaıdarov memlekettik qoldaý sharalaryn, naqtyraq aıtqanda, qurylys-montaj jumystaryna, tehnıka, ózge de aýyl sharýashylyǵyna qajetti jabdyqtar men jemshóp satyp alýǵa jáne asyl tuqymdy mal qunyn arzandatýǵa jumsalǵan shyǵyndardy óteý tártibin túsindirdi.
Oblys ákiminiń orynbasary Vıktor Prıbke jobany keńeıtýdi, sandyq tehnologııalardy engizýmen mal sharýashylyǵy bazalaryn salý úshin jobalyq-smetalyq qujattama daıyndaýdy, qoldan uryqtandyrýdy qoldaný arqyly joǵary tuqymdy ósirýdi usyndy. Jobanyń ózin ákimniń orynbasary qaryz qarajatyn tartý arqyly júzege asyrǵan jón dep atap ótti.
«Aq marjan», «Akýpov», «Bereke» sharýa qojalyqtary basshylarymen kezdesýde kóktemgi egis jumystaryn júrgizý jáne aýyspaly egisti saqtaı otyryp jerdi tıimdi paıdalaný máseleleri talqylandy.
«Kóktemgi egis jumystaryna kirisip kettik. Egis alqabyndaǵy tehnıkalar aldyn ala daıyndaldy, sharýashylyqtar jetkilikti mólsherde arzan dızel otynymen jáne tuqymmen qamtamasyz etilgen», - dedi «Aq marjan» sharýa qojalyǵynyń basshysy Leonıd Polevodın.
Kezdesýge qatysýshylar tyńaıtqyshtar men pestıtsıdterdiń qunyn sýbsıdııalaý, tuqym sharýashylyǵyn damytý jáne t.b. suraqtaryna jaýap aldy.
Sapar qorytyndysy boıynsha oblys ákiminiń orynbasary aýdandarǵa egisti jedeldetý jáne naýqandy ońtaıly merzimde aıaqtaý jóninde naqty tapsyrmalar berdi.