Qaraǵandy oblysynda kıberpol arqyly alaıaqtarǵa aldanǵandardyń aqshasy qaıtaryldy
Internet arqyly jasalatyn qylmysty tergeý qıyn. Degenmen, 26 shildede Balqash qalalyq polıtsııa bóliminiń «Kıberpol» qyzmetkerleri júrgizgen keshendi jedel-izdestirý is-sharalary barysynda 25 jastaǵy Almaty qalasynyń turǵyny ustaldy.
Ol ózin onlaın jáne oflaın túrde gazon satatyn dúkenniń menedjerimin dep tanystyrǵan. Osylaısha, WhatsApp jelisi arqyly Balqash qalasynyń turǵynyn «gazon ákelip beremin» dep aldap, bir mln teńgeden astam aqshasyn ıelengen. Sodan baılanysyn úzip, habarsyz ketken. Kúdikti jábirlenýshiden alǵan aqshany qaıtardy.
Osyǵan uqsas taǵy bir jaıt Qaraǵandy turǵynynyń da basynan ótti. «Kıberpol» qyzmetkerlerine 28 jastaǵy azamat shaǵymdandy. Jas otbasy kólik satyp alý úshin áleýmettik jeliden habarlamalardy qaraǵan.
«Qazaqstandyq memlekettik tirkeý nómiri bar kólik kórshiles elde tur dedi. Sondyqtan da onyń baǵasy arzandaý boldy. Tún bolsa da habarlastyq. Kúdikti bizdiń qońyraýymyzǵa jaýap berdi. Osydan keıin biz aldyn ala 300 myń teńge aqsha jiberýge kelistik. Sol kezde «kólik satýshy» bizden sol ýaqytta 60 myń teńge aqsha salýdy ótinip, qalǵan aqshany tańerteń salýǵa bolatynyn aıtty. Sonymen, tańerteń qalǵan aqshany salatyn kezde bank bizdiń esep-shotymyzdy buǵattap tastady. Onyń aldynda maǵan bank menedjeri habarlasyp, bizdiń kúdikti esep-shotqa aqsha salyp jatqanymyzdy eskertti. Menedjerdiń habarlamasynan keıin mende kúdik paıda boldy. «Satýshymen» sóılesip, bank meniń esep-shotymdy buǵattap tastaǵanyn aıtqanymda, ol ózin dóreki ustap, maǵan qalǵan aqshany Qiwi koshelekke salýymdy talap etti. Men oǵan qanshalyqty jaǵdaıymdy túsindirgenime qaramastan, ol meni tyńdamady. Keıin polıtsııaǵa habarlastym. Polıtsııa qyzmetkerlerine rızashylyǵymdy bildiremin. Olar maǵan alaıaqtardyń áreketteri týraly maǵlumat berdi. Alaıaqqa salyp jibergen aqsham qaıtaryldy. Barlyq turǵyndardy alaıaqtardyń arbaýynan saq bolýǵa shaqyramyn», - deıdi Ksenıa Teslıa.