Qaraǵandy oblysynda kenshilerge ıpoteka berý jalǵasyp jatyr

QARAǴANDY. QazAqparat – Qaraǵandy oblysynda kenshiler men metallýrgterdiń turǵyn úı jaǵdaıyn jaqsartý jalǵasyp jatyr. Ekinshi jyl qatarynan olar úshin arnaıy baǵdarlama jumys isteıdi. Bul - oblys ákimdigi men «Otbasy banktiń» birlesken jobasy. Atalmysh baǵytqa oblys ákimdigi 1 mlrd teńge bóldi, bank 500 mln teńge berdi. Bıyl 75 otbasy páter satyp ala alady, dep habarlaıdy QazAqparat tilshisi.

Bolashaq qonystanýshylarǵa sertıfıkattardy Qaraǵandy oblysynyń ákimi Ermaǵanbet Bólekpaev pen Otbasy Bank basqarma tóraǵasy Lázzat Ibragımova tabys etti.

«Ekinshi jyl qatarynan «Otbasy bankpen» birlesip, biz kenshiler men metallýrgterdi jeńildikpen ıpotekalyq nesıelendirýge sertıfıkattar beremiz. Baǵdarlamaǵa qatysýshylardyń tizimin ótken jyldaǵydaı «ArselorMıttal Temirtaý» kómir jáne bolat departamentteriniń kásipodaqtary qurdy. Búgin «Otbasy bank» alǵashqy turǵyn úı qaryzdaryn maquldady. Bıyl kem degende 75 otbasyn turǵyn úımen qamtamasyz etemiz. Biz osy baǵytta «Otbasy bankimen» jumys isteýdi jalǵastyramyz. Sonymen qatar, oblysta 35 jasqa deıingi jas mamandarǵa arnalǵan ıpotekalyq baǵdarlama jumys isteıdi. Geografııany da keńeıttik – Balqash, Saran, Temirtaý qalalary da kiredi. Ári qaraı monoqalalardaǵy jas mamandar men jumysshy jastardy ıpotekamen qamtımyz», - deıdi Ermaǵanbet Bólekpaev.

«Qaraǵandy oblysy týraly aıtatyn bolsaq, qazaqstandyq batyl shahterler men metallýrgterdiń beıneleri kóz aldymyzǵa keledi. Bul - eńbek adamdary. Biz kásipodaqtarǵa irikteý ótkizgeni úshin alǵys aıtamyz. Árıne, jergilikti jerde, shahtada ár adam kimniń baspanaǵa muqtaj ekenin, kásiporyn qaı jumysshynyń jaǵdaıyn jaqsartýǵa nıetti ekenin jaqsyraq biledi. Qaraǵandy metallýrgııa kombınatynyń basshylyǵy baǵdarlamaǵa qatysyp, qosymsha resýrstar bóledi dep úmittenemiz», – deıdi Lázzat Ibragımova.

Nesıe 15 jylǵa deıin jyldyq 5% mólsherlememen beriledi. Bıyl qaryzdyń eń joǵary somasy 20 mln teńgege deıin ulǵaıtyldy.

Páterdi Qaraǵandy, Saran, Abaı, Shahtınsk jáne Temirtaýda bastapqy jáne qaıtalama naryqtan satyp alýǵa bolady.

Jeńildetilgen ıpotekaǵa qatysýshylardy kómir jáne metallýrgııa uıymdarynyń kásipodaq komıtetteri anyqtady.

«Tentek» shahtasynyń AMJÝ bastyǵynyń orynbasary Artem Vojjovty jubaıy men eki balasy qoldady.

«Shahtada shamamen 8 jyl jumys isteımin. Ata-anammen birge turdyq, endi óz baspanamyz bolady. Shahtınsk qalasynda úsh bólmeli páter tabyldy. Balalarmen esh ýaıymsyz kirip, ári qaraı tura berý úshin jóndeýden ótken páter tabýǵa tyrystyq. Baǵdarlama jaqsy. Ony balalarymyzdyń bolashaǵyna ýaıymdamaýymyz úshin jalǵastyrý kerek», – dep bólisti Artem Vojjov.

2022 jyly kenshiler men metallýrgter úshin turǵyn úı baǵdarlamasyn iske asyrýǵa 1,7 mlrd teńge bólindi.

134 otbasy turǵyn úı jaǵdaıyn jaqsarta aldy.