Qaraǵandy oblysynda kásipkerler maldyń ish maıynan kir sabyn shyǵarady

QARAǴANDY. QazAqparat – Qaraǵandy oblysy Qarqaraly aýdanynda aǵaıyndy kásipkerler maldyń ish maıynan jasalǵan kir sabyn óndirisin jolǵa qoıdy.

Olar ónimniń synaq partııalaryn shyǵaryp-aq qoıǵan jáne oǵan sapa sertıfıkatyn rásimdeýde, dep habarlaıdy QazAqparat tilshisi.

Jańatoǵan aýylynda turatyn nemere aǵaıyndy Dýman Qojekın men Meıirlan Bodaý úıiniń aýlasynda kir sabyn shyǵaratyn shaǵyn tseh ashty. Bul iske kirispes buryn olar Almatyda kýrstarda oqyp, ınternet arqyly osy taýashany zerttegen eken. Óz qarajatyn salyp, olar Qyrǵyzstanda qarapaıym et tartqyshpen jumys isteý prıntsıpiniń uqsastyǵyna baılanysty et tartqysh dep atalatyn apparatty satyp aldy.

«Buryn aǵam ekeýmiz mal sharýashylyǵymen aınalysatynbyz. Ótken jyly aýdan ákiminiń grantyn alyp, qymyz óndirisin jolǵa qoıdym. Sonymen qatar, biz kir sabyn shyǵaratyn tsehty iske qosý qajet dep sheshtik. Bizde biregeı retsept bar, onyń arqasynda keremet sapaly jáne arzan sabyn alamyz. Negizgi quramy – janýarlardyń ish maıy. Biz synaq partııalaryn shyǵaryp jatqanda, aýyl turǵyndary bizge janýarlardyń maıyn sata bastady. Onyń ornyna biz olarǵa sabyn beremiz nemese aqsha tóleımiz. Bizdiń aýdannyń dúkenderine birneshe partııa jiberildi. Sabyn suranysqa ıe. Sapa sertıfıkatyn alǵannan keıin biz úlken kólemde satylymdardy bastaımyz jáne basqa naryqtarǵa shyǵamyz», – deıdi Meıirlan Bodaý.

Aǵaıyndy kásipkerler sabyndy týǵan aýyly Jańatoǵannyń atymen atady. Olar ony 150, 200, 250 gramm bolatyn úsh túrde shyǵarady. Táýligine tseh myńǵa deıin ónim shyǵara alady.

«Biz mundaı qýatqa áli shyqqan joqpyz, óıtkeni biz sapa sertıfıkatyn kútip otyrmyz. Bolashaqta oblys ákiminiń grantyna arnalǵan konkýrsqa qatysqymyz keledi. Eger alsaq, sabyn oraý úshin apparat satyp alamyz. Árıne, óndiristi ulǵaıta otyryp, birneshe adamdy jumysqa alamyz», – deıdi Meıirlan.

Jańatoǵan kir sabynynyń baǵasy ortasha naryqtyq qunnan 10 paıyz tómen. Óndirýshiler ony kótermeımiz deıdi. Sondaı-aq, bolashaqta kásipkerler ónim assortımentin keńeıtip, hosh ıisti jáne suıyq sabyn shyǵarmaqshy.