Qaraǵandy oblysynda karantın kezinde bızneske qandaı qoldaý kórsetilýde

QARAǴANDY. QazAqparat – Sońǵy 7 aıda Qaraǵandy oblysynyń 2 myńnan astam kásipkeri memleketten qarjylaı qoldaý aldy. Bul maqsatqa shamamen 72 mıllıard teńge bólindi, dep habarlaıdy QazAqparat tilshisi.

Bızneske qatysty daǵdarysqa qarsy qandaı sharalar qabyldanǵanyn óńirlik kásipkerlik basqarmasynyń basshysy Tatıana Ablaeva Óńirlik kommýnıkatsııalar qyzmeti alańynda ótken brıfıngide aıtyp berdi.

«Bıznestiń jol kartasy – 2025» baǵdarlamasy boıynsha osy jyldyń tamyz aıynda 1,7 mıllıard teńge somasynda qosymsha qarajat túsedi.

Qarjylandyrýdyń jalpy somasy 8,7 mıllıard teńgeni quraıdy, bul 2020 jyldan 3 ese kóp. Qyrkúıek-qazan aılarynda jańa bıznes-ıdeıalardy júzege asyrý úshin osy baǵdarlama boıynsha granttarǵa baıqaý bastalady», – dep málim etti vedomstvo basshysy.

Memleket basshysynyń tapsyrmasy boıynsha 1 shildege deıin shaǵyn jáne orta bıznesti jaldaý aqysynan bosatý uzartyldy. Bul memlekettik jáne kvazımemlekettik menshiktegi nysandarǵa qatysty boldy. Barlyǵy 608 shart toqtatyldy.

Pandemııadan eń kóp zardap shekken ekonomıka sektorlary úshin jeńildetilgen nesıe berý jobasy jumys isteıdi. Qajetti nesıeni bıznesmender jyldyq 6%-ben ala alady. Sondaı-aq, «Bastaý Bıznes» jobasynyń túlekteri úshin shaǵyn jáne orta bızneske jeńildikpen shaǵyn nesıe berý jumys isteıdi. Osy aıdan bastap «Jumyspen qamtýdyń jol kartasy» baǵdarlamasy boıynsha 500 shaǵyn nesıe beriletin bolady.

Tatıana Ablaevanyń aıtýynsha, aýyl kásipkerleri úshin nesıeniń maksımaldy somasy 7,3 mıllıon teńgeni, al qala kásipkerleri úshin – 23,4 mıllıon teńgeni quraıdy.

Tamyz aıynda jastar kásipkerligin damytýǵa oblys ákiminiń 100 grantyn berýge ótinimder qabyldaý bastalady. Bir grant - mıllıon teńge. Sonymen qatar, óńirdiń barlyq qalalary men aýdandarynda jas kásipkerlerge grant berý jalǵasýda.

«Búginde Buqar jyraý, Qarqaraly, Jańaarqa aýdandarynda jáne Saran qalasynda granttar berildi. Bul maqsatqa barlyǵy 150 mıllıon teńge qarastyrylǵan», – dep atap ótti Tatıana Ablaeva.

Granttar «Eńbek» baǵdarlamasy boıynsha da bólinedi. Qazirdiń ózinde árqaısysy 200 AEK boıynsha 685 grant berildi. Jyl sońyna deıin taǵy 290-y iske asyrylatyn bolady.

«Osy jyldyń 7 aıynda 2 myńnan astam kásipkerge 71,8 mıllıard teńge kóleminde qarjylaı qoldaý kórsetildi. «Bastaý Bıznes» boıynsha 1 247 adam

oqytyldy», – dep qorytyndylady sózin spıker.